守龍守上癮!施治「復出」追夢,簽約做冰球守門員

睇足365 於 10/10/2019 發表 收藏文章
每個球員都因為唔同原因而踢某個位置,有人話因為猜輸所以要守龍門,但就有人因為天生就享受為球隊把守大門而做守門員。一代捷克門神施治就一定係真心鍾意守龍。


37歲嘅施治上個球季結束時先至掛靴,離開阿仙奴,同時結束職業足球員生涯,重返車路士擔任技術總監。點知佢幾個月後就忍唔住,宣布「復出」。所謂「復出」,只係指佢再次擔任守門員,但其實佢今次係「踩過界」去到另一個運動領域,係新人先啱。



今日,多間英國傳媒報導,施治與冰上曲棍球球隊僑福鳳凰隊 (Guildford Phoenix) 簽約,成為一名冰球門將。呢間球會位於倫敦南部,於2017年成立,現時正參加英國冰球第4級別聯賽。施治喺Twitter上面表示,佢係喺車路士做技術總監嘅工餘時間打冰球嘅。事實上,創立僅僅兩年嘅鳳凰隊係一支半職業球隊,好多半職業球隊嘅球員都一樣有一份正職,喺工餘時間先練波,所以施治應該會繼續做車路士嘅工作。


原來,施治自細已經鍾意睇冰球比賽同打冰球。雖然作為香港人,對於冰球完全唔認識,但翻查資料,捷克冰球國家隊現時世界排名第5,歷史上曾經取得6次世錦賽冠軍及奧運1金1銅,成績相當優異,難怪施治話細細個就鍾意冰球。施治以37歲之齡,追尋兒時夢想,實在佩服,希望佢打得開心!



Source: Sky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→