好波不妨一睇再睇！土耳其中場罰球連中三元

喺足球比賽入面個人連中三元本身已經唔係易事，如果係用射罰球嘅方式入夠三球，就更加係難上加難！足球史上罰球專家有好多，不過能夠一場波入三球罰球嘅就少之又少，資歷較深嘅球迷應該會諗起米赫洛域（Sinisa Mihajlovic）1998年為拉素上陣時試過做出呢個壯舉，其實近幾年都有出現過，不過就唔係喺主流聯賽出現，包括「新鮮滾熱辣」嘅呢一次。

米赫洛域：
https://www.youtube.com/watch?v=LTN54vUayCM
土耳其超級聯賽相信已經唔多香港球迷留意，第二級別嘅土耳其甲組聯賽就更加冷門，不過一個罰球帽子戲法真係值得一睇！日前一場土甲比賽，由Balikesirspor對Akhisarspor，27歲嘅土耳其中場卡里斯（Taskin Calis）技驚四座，個人射入三球罰球，包辦全場所有入球，助Balikesirspor以3-0擊敗Akhisarspor。


第一個入球出現喺41分鐘，Balikesirspor取得一個娥眉月頂正中稍後位置罰球，倒戈嘅卡里斯用右腳射門，個波喺門框右上角墜落，門將鞭長莫及。只係4分鐘後，卡里斯再次喺禁區頂附近主射罰球，今次更接近龍門，位置係娥眉月右邊，卡里斯今次就射向左方，喺柱邊入網，令球隊喺半場領先2-0。去到下半場補時階段，Balikesirspor又喺差唔到位置有罰球機會，今次位置更偏向右邊，卡里斯亦係射向遠柱入網，完成帽子戲法！到底係射得靚定門將渣？留俾大家評論。

https://www.youtube.com/watch?v=5d7mOmzO4pU
講真，通常門將都會估計右腳球員喺右邊會選擇彎右方近柱，但卡里斯兩次都選擇途程稍遠嘅左方遠柱，除咗有捉心理成分之外，對於皮球飛行軌跡嘅掌握都係要妙到毫巔先得。不過又話時話，呢場波Akhisarspor上半場已經有一名場區球員喺兩黃一紅，再加門將直紅被逐，打少兩個，Balikesirspor亦無力憑生波入球，但另一方面，Akhisarspor又喺危險地帶輸太多罰球，真係唔知講咩好，難怪呢兩隊波都係僅僅憑得失球差暫時處於降班區之上。


順帶一提，文章開頭提過米赫洛域（Sinisa Mihajlovic），呢場Balikesirspor正選左翼剛好又係嚟自塞爾維亞嘅米赫洛域，不過係尼曼查米赫洛域（Nemanja Mihajlović），不過係同罰球王米赫洛域冇關係嘅。