【天馬行空】摩佬下台呼聲高 安迪格雷評魔帥人選:「你哋實會笑,我提議搵馬天尼斯」

睇足365 於 28/08/2018 發表 收藏文章
曼聯啱啱喺英超第三輪,主場以0-3不敵熱刺,令紅魔鬼開季三仗兩敗,共失7球,主帥摩連奴備受壓力,越來越多人猜測或呼籲佢盡快下台。


曼聯開季首場以2-1小勝李斯特城,次輪以2-3不敵白禮頓已經令曼聯球迷怒火中燒,今仗主場出擊竟以0-3大敗予熱刺,摩連奴以往面對「Big 6」對手場面上甚少一面倒嘅往績,以及一向引以自豪嘅穩守足球,皆蕩然無存。雖然摩連奴季前一再抱怨管理層未能為球隊引入心儀中堅,但亦不能無視球隊近一兩季喺其他位置上已收購費特、馬迪、山齊士等高價球員,球會由上季轉會窗至今已淨支出2.12億鎊 (已扣除轉會收入)。


曼聯中堅級數,自然對摩帥部署有所限制,但不論主場對熱刺完負,23射5中目標零入球,或作客白禮頓理應掌控球賽而被對手三度洞穿大門,似乎並非中堅級數可以完全推托 (當然噚晚失嗰三球後衛都有好大責任),顯然摩連奴中前場部署亦出現不少問題,導致攻不銳守不穩。


即使喺今仗之前,外間已有傳聞認為,一旦摩連奴今季之內下台,前皇馬主帥施丹將會接手,因為施丹主動離開皇馬之後,目前仍然賦閒在家,而且喺皇馬取得成功之後,佢應該只會執教歐洲豪門。不過,施丹之所以離開皇馬,坊間有評論認為係由於佢有感皇馬即將迎來大變,多位主力球星老化,又有C朗拿度離隊,倒不如「急流勇退」,可以預視假若摩連奴被逼離開曼聯,攤子之爛遠超如今皇馬面臨嘅挑戰,施丹會否押上名聲,接手其中一份球壇最大壓力嘅工作,個人十分有保留。

喺《beIN Sports》直播節目上,主播 Richard Keys 認為摩連奴已「時日無多」:「我覺得佢喺曼聯已經玩完。球會陷入危機,我唔覺得班球員想為佢上陣,而球員亦唔會想去呢隊波,佢哋嘅足球一啲都唔好睇。」 Richard Keys 接續提出應該由施丹接手執教。

及後,前蘇格蘭國腳安迪格雷 (Andy Gray) 就表示,呢個提議太冇創意,佢更加語出驚人:「我會提出另一個名字,你哋會笑我,嗰個就係馬天尼斯 (Roberto Martinez) 。」 現場隨即出現 dead air , Richard Keys 就回應:「我唔會笑你,我直頭無話可說。」

loading


馬天尼斯今屆世界盃帶領「歐洲紅魔」比利時殺入四強、取得季軍,其中擊敗巴西一仗為人稱道,佢此前曾經執教英超中游球隊愛華頓,以及勇奪足總盃冠軍但降班嘅韋根。


曼聯前鋒盧卡古不論愛華頓或比利時國家隊,同樣於馬天尼斯麾下發揮出色,靠右側活動以身型壓制對手左閘作為反擊支點嘅踢法無往而不利,安迪格雷嘅建議,球迷固然可以選擇一笑置之,但又是否天馬行空到連被討論嘅資格都冇?留待球迷評價。

Source: Daily Mail、beIN Sports

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→