多蒙特體育總監索斯爆料,曼聯曾與英格蘭新星查頓辛祖經理人會面

睇足365 於 12/09/2019 發表 收藏文章
英格蘭翼鋒查頓辛祖 (Jadon Sancho) 年僅19歲已於德甲「二哥」多蒙特站穩陣腳,光芒四射,連帶喺英格蘭國家隊亦得到機會,最近對科索沃一仗,佢貢獻兩入球、一助攻;球會方面,辛祖德甲開季三戰,已錄得2入球3助攻,效率驚人。有意提升陣中本土年輕球員質素嘅曼聯,自然對辛祖「虎視眈眈」。


多蒙特體育總監兼球會名宿索斯 (Michael Zorc) 近日接受訪問時,透露曼聯於夏天轉會窗內曾經接觸辛祖。早於8月,多蒙特CEO華斯基 (Hans-Joachim Watzke) 已指出,有一豪門球會曾向多蒙特求購辛祖,但遭到拒絕。睇中辛祖嘅,恐怕唔只曼聯,不過根據多蒙特體育總監索斯所講,可以肯定曼聯的確希望引入呢位炙手可熱嘅年輕翼鋒。



索斯於亞馬遜電子平台拍攝嘅紀錄片《Inside Borussia Dortmund》上表示:「現時 (影片於8月播出) ,一個熱門嘅話題係辛祖同曼聯。

我、辛祖、辛祖經理人,的確曾經進行會面,而曼聯都邀請咗辛祖經理人會面。據我所知,辛祖經理人已經同曼聯講咗,就算佢哋出幾多錢,我哋多蒙特今個夏天都唔會放人。球員自己亦都無意喺今個夏天離開。」

2017年由曼城以700萬英鎊轉投多蒙特嘅辛祖,為蜜蜂兵團上陣60次,已射入17球、交出27個助攻,而且年僅19歲,前途無可限量,估計今日即使花費10倍價錢亦未必可以打動多蒙特放人。根據德國著名網站《Transfermarkt》估計,辛祖現時市場價值高達1億歐元,合約期至2022年6月30日。



Source: Sky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→