夏蘭特衝刺速度直逼世界紀錄,成怪物級新星全因照抄「一男子」

睇足365 於 20/02/2020 發表 收藏文章
19歲前鋒艾寧夏蘭特 (Erling Haaland) 日前再一次技驚四座,今季入球如麻嘅佢喺歐聯賽場上為多蒙特包辦兩個入球,以2-1擊敗巴黎聖日耳門,更於比賽中錄得驚人衝刺速度,原來佢年紀輕輕就有咁恐怖嘅表現,全因為各方面都向偶像學習。


夏蘭特效力薩爾斯堡紅牛時已經令廣大球迷驚訝,奧地利球隊向來並非歐洲一線球隊,縱使薩爾斯堡有紅牛集團財力協助,亦經常輸出「潛力股」,但整體實力上仍與眾多歐洲強隊有距離,不過夏蘭特竟然為薩爾斯堡於歐聯分組賽創下多個入球紀錄,包括於個人頭4場歐聯比賽射入7球,改寫歐聯歷史。轉會多蒙特後,有人估計佢適應需時,畢竟德甲與奧地利甲組水平有別,但夏蘭特於德甲首戰已上演帽子戲法,頭5場比賽射入8球。德甲已進行22輪聯賽,而呢5場比賽已令夏蘭特直奔德甲射手榜第11位。


首次為多蒙特出戰歐聯,夏蘭特面對強敵PSG,先於門前補射得手打破僵局,球隊隨後被尼馬入球追平,但於不足2分鐘內,多蒙特快速反擊,夏蘭特得球於禁區外直接勁射,直衝網頂轟入,觀看直播時更可聽到破網時嘅「嘭」一聲,令人目瞪口呆。

beIN SPORTS Asia - Teen sensation Erling Haaland scores BOTH goals in Dortmund's win vs PSG | UCL 19/20 Moments

最令人驚訝嘅係夏蘭特身高1.94米,擁有柱躉式中鋒嘅身高、為隊友鋪橋搭路嘅策應意識、天生嘅射手觸覺,更有與身高不相稱嘅靈活性。今場比賽一次反擊攻勢中,夏蘭特更造出6.64秒跑完60米衝刺嘅速度。



報導更指,呢個速度直逼60米衝刺跑嘅世界紀錄。



原來,跟據佢曾經效力曼城及列斯聯嘅爸爸艾菲夏蘭特 (Alfie Haaland) 透露,夏蘭特一直向偶像學習:「我踢波時都要盡力保持自己踢波嘅決心,但艾寧 (兒子艾寧夏蘭特) 早已懂得有所犧牲,佢年僅16歲就搬去莫迪踢波,而且比我自己踢波時態度仲更專業。

佢聽聞艾夫拿講述與C朗拿度食午餐嘅故事,話C朗午餐只會食魚,唔會食其他嘢。

於是艾寧就嘗試照做,因為C朗去到34歲仍然處於足球界巔峰,證明做正確嘅事嘅價值。」

不僅如此,原來艾寧夏蘭特除咗喺去年一個訪問中表示要效法伊巴謙莫域之外,亦表示全因C朗先成為一名職業球員,睇嚟佢真係有可能發展成為兩人嘅混合體,而佢刻苦鍛煉及專業嘅態度無疑都係C朗得以立足於頂點嘅原因。

Source: SportbibleESPN

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→