基沙文同門柱打one-two入波，馬體會3-0大勝艾拉維斯止不勝

西甲第15輪賽事，馬德里體育會主場近戰艾拉維斯，賽前馬體會近四場聯賽有三場和波，分別同雷加利斯、巴塞隆拿及基羅納。馬體會最終憑卡連歷、基沙文及洛迪嘅入波以3-0擊敗艾拉維斯。喺最近有迪亞高哥斯達宣布因傷長唞及今仗有盧卡斯靴南迪斯韌帶受傷嘅不利消息下，稍稍可以鬆一口氣。


今仗其中一個入球非常有趣，就係基沙文於82分鐘嘅入球。當時馬體會策動快速反擊，基沙文接應隊友直線，去到中圈已經接近形成單刀之勢，佢千里走單騎殺入禁區過埋門將，但角度收窄加上守衛力逼落腳之下，基沙文將個波向前一推，離腳中柱彈出。一般情況之下，呢個已經成為本周單刀失機「金球」之一。點知錯有錯著，個波竟然彈返落基沙文腳下，佢今次就補射成功，彷彿變成one-two入波。

https://i.imgur.com/Y3qR9qF.gif
另外，喺較早嘅時間，克羅地亞鋒將卡連歷接應傳中，搶點射入個人加盟馬體會以嚟首個西甲入球，相信會為有迪亞高斯達受傷嘅馬體會鋒線打下強心針，增強信心後期望佢可以分擔基沙文嘅入球壓力。


不過，馬體會後衛盧卡斯靴南迪斯於比賽36分鐘一次碰撞中，被倒地嘅對手壓到右膝，因傷被調離場。賽後，馬體會官方證實，盧卡斯靴南迪斯右膝內側韌帶二級扭傷，未有公布歸期。賽後，馬體會錄得7勝7和1負，15輪取得28分。
全場精華

https://streamable.com/i85w6