域陀華迪斯苦勸卡斯拿斯退役:「在生命面前,有些險情非撲救所能化解」

睇足365 於 06/05/2019 發表 收藏文章
前西班牙國家隊門神卡斯拿斯最近喺波圖參加操練期間,心臟病發送院,引起球壇各界關注。不幸中之大幸,卡斯拿斯已經接受治療,已無大礙。不過,運動員遇上心臟問題,可大可小,所以作為前球會死敵兼國家隊隊友嘅域陀華迪斯,最近喺社交媒體上發表親筆信,力勸卡斯拿斯退役。


域陀華迪斯同卡斯拿斯分別長時間擔任巴塞及皇馬正選門將,喺西班牙國家隊亦成為隊友,二人場外交情匪淺,域陀華迪斯宣佈退役時,卡斯拿斯亦有撰寫親筆信致意。



因為擔心卡斯拿斯健康情況,域陀華迪斯於信中表示:「喺足球世界入面,有人選擇咗成為門將,其他人就選擇其他道路。對於天生就注定要戴起門將手套嘅人嚟講,你係佢哋嘅偶像,佢哋訓練時夢想有日可以好似你咁身穿一號球衣高舉世界盃。

你永遠都係所有門將嘅夢想,一個比同時代所有人飛得更高更遠,將不可能變成可能,將每個動作完美展現,同埋用非凡撲救令所有人嘆息嘅人。

諗起我哋之間經歷嘅一切,令我執筆時難免激動。我諗起我哋一次又一次場上嘅對決,有你喺我身前,令我更懂得珍惜一切。你可能唔知道,你喺訓練中對我有幾大影響。整個西班牙,都為你喝采。

親愛嘅Iker,身為守門員,我哋一向一往無前。不過喺生命中,一啲危機去到我哋面前,唔係一個簡單嘅撲救可以化解。你嘅心臟,仍然要為以你為目標嘅人而跳動。作為朋友同過去嘅對手,我希望你可以再次成為嗰隻白色嘅雄獅,不過今次係喺場邊。你嘅傳奇已經由你過去嘅成就寫下。

門將對門將嘅肺腑之言。

V.V.」

的確,真正喜歡卡斯拿斯嘅人,呢一刻都會希望佢退役,而唔想佢繼續喺球場上但有可能面臨生命危險,因為生命高於足球。

Source: Marca

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 彭啟泰
    彭啟泰 於 06/05/2019 評論 NO. 1

    原來vv都幾好文采

快捷鍵:←
快捷鍵:→