唔係費格遜!朗尼稱曾合作最佳教練:「一定係雲高爾!我將來做領隊要學佢」

睇足365 於 30/06/2019 發表 收藏文章
前英格蘭國腳朗尼現時於美職聯球隊華盛頓聯 (DC United) 效力,呢位33歲老將生涯曾經效力愛華頓及曼聯兩間英格蘭球會,又於國家隊上陣120次,經驗豐富,最近更有球隊邀請佢出任主帥,咁佢自己最欣賞嘅主帥又係邊位呢?


最熱門嘅答案一定係前曼聯領隊費格遜爵士!朗尼年少時於愛華頓一鳴驚人,但要數佢真正成為一位球星,必定係被費Sir帶到曼聯之後。朗尼最終為曼聯效力長達13年,其中喺費Sir麾下效力9年,按理亦受呢位傳奇教頭影響最深。

不過,根據《Sky Sports》引述報導,朗尼最近接受專訪時表示,認為自己合作過嘅最佳教練係雲高爾 (Louis van Gaal) :

「雲高爾係我所合作過嘅教練中,最出色嘅一個,100%係佢。

佢嘅戰術技巧、賽前部署準備、對最細微細節嘅關注,都令我感到驚嘆。呢啲特質令我好敬仰佢,我喺之前從來未試過咁樣睇嘢。

雲高爾知道佢嘅工作方式對球員嚟講係好艱苦,當時我有提醒佢呢一點,我哋亦都可以好好咁傾呢個問題。

我對於後來嘅發展感到可惜,但有一樣嘢我可以肯定——我喺佢身上學到好多嘢,而且我將來成為領隊嘅時候一定會學以致用。」


雲高爾曾執教阿積士、巴塞隆拿、拜仁慕尼黑及荷蘭國家隊等,獲獎無數,可惜2014-16年兩個球季接手曼聯「爛攤子」,分別取得英超第4位及第5位,以及一個英格蘭足總盃冠軍,仍難逃被炒命運,不久後更宣布退休。

根據《Sky Sports》報導,朗尼承認已得到來自英格蘭及美國嘅球會邀請佢出任主帥,佢就表示現時仍然享受球員生涯,正努力完成教練課程,將來結束球員生涯後,將會成為教練。

Source: Sky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→