咩玩法？盧卡斯靴南迪斯或面臨半年監禁！

根據Sky Sports及BBC報道，現時效力拜仁慕尼黑嘅2018世界盃冠軍成員盧卡斯靴南迪斯（Lucas Hernandez）或要面臨牢獄之災，佢目前已被馬德里法院下令監禁。


報道指事件源於2017年一宗案件：於2017年2月3日，當年盧卡斯靴南迪斯仍效力馬德里體育會，盧卡斯靴南迪斯與女友Amelia Ossa Llorente爭吵後，因為涉嫌襲擊女友而被拘捕，佢嘅女友就受輕傷送院。雖然報道指佢嘅女友並冇提出超訴，但盧卡斯靴南迪斯仍被馬德里法院裁定家庭暴力罪名成立。有趣嘅係佢女友同樣被警方控告涉及暴力行為、襲擊及破壞財產，兩人同時被判31日社區服務令。盧卡斯靴南迪斯又被頒令半年內禁止進入女友500米範圍之內，而呢個正係佢今次出事嘅原因。

（當年嘅女友，現時已經係盧卡斯靴南迪斯嘅太太）

原來兩位激烈爭吵之後，感情仲好好，幾個月後就去咗結婚同埋旅行度蜜月！盧卡斯靴南迪斯喺度蜜月後返到西班牙，就被警方拘捕，指佢違反禁令，判監禁半年，暫緩執行。

最新消息指出，盧卡斯靴南迪斯嘅上訴被法院駁回，馬德里法院要求佢喺10月19日到法院報到，之後佢有10日時間選擇監獄及自行入獄。

拜仁慕尼黑方面暫時未有回應，BBC指拜仁慕尼黑稱對案件進展並不知情。球員本人亦未有回應，佢最近剛剛跟隨法國國家隊出戰歐國聯決賽。報道指，盧卡斯靴南迪斯正再次提出上訴。



有球迷就講笑咁講，話盧卡斯靴南迪斯加盟「監獄FC」之後，都要踢返個中堅位先，因為左閘位置被曼城嘅班捷文文迪霸住咗。仲有人表示，盧卡斯靴南迪斯會喺「監獄FC」同班捷文文迪、施格臣同比素馬合作。雖然好衰，但唔爭氣地笑咗。