咁都得?羅馬里奧給「耶穌仔」的建議:「要多啲『搞嘢』」

睇足365 於 11/05/2018 發表 收藏文章
羅馬里奧(Romario)作為巴西足球名宿,一眾新一代巴西前鋒如果可以得到呢個級數嘅前輩指點,甚至得到一句評語,真係「袋錢入你袋」,不過呢位前輩有啲特別嘅秘訣,就未必個個啱用囉。


巴西新一代前鋒加比爾捷西斯(Gabriel Jesus)自加盟曼城及傷癒之後,表現大受好評,亦能迅速適應英超環境,年輕又潛質優厚,自然被寄予厚望。


現年52歲嘅羅馬里奧係巴西喺94世界盃嘅奪冠功臣之一,佢更射入5球,拎到世界盃金靴獎。佢而家係巴西國會議員,但仍然不忘指點球壇後輩,不過眾多後輩之中,佢似乎特別睇好「耶穌仔」,唯獨點名俾佢一個建議。

「我嘅建議係要有足夠嘅性生活,咁等於叫你盡可能喺放假嘅時候好好放鬆。當然啦,喺比賽日同比賽入面,你都要保持專注喺比賽中。

我相信捷西斯好清楚自己應該點踢,同埋代表巴西國家隊嘅意義,佢需要喺世界盃入面入波,呢樣係最重要。」


「佢需要明白,喺世界盃入面每一次有入波機會,都可能係最後一次。世界盃同其他比賽唔同,你需要保持100%專注,如果唔係,就代表你冇為國家盡全力。

佢需要做嘅嘢,就係喺世界盃上陣,並且入波。

佢喺歐洲踢波係好事,因為世上最好嘅80、90%球員都喺嗰度,佢可以喺歐洲同大部分頂級球員交鋒。

不過我建議佢第一樣要做嘅事,就係要有好多高質素嘅性生活。」

羅馬里奧曾經話過自己喺世界盃期間經常有性生活,佢咁樣同「耶穌仔」講嘅意思應該都係叫佢喺放假時盡情享受,不過就未必個個人享樂嘅方式都係一樣囉,換成打機唔知有冇效呢?「耶穌仔」今年得21歲,會唔會俾羅馬里奧教壞㗎?咪住先,點解性生活頻密就係壞?其實好普通啫。


Source: Daily Mail

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→