呢單嘢唔係我跟開? 曼聯CEO活華特:「買人唔係我話事」

睇足365 於 24/10/2019 發表 收藏文章
英超球隊曼聯近年於費格遜爵士退休後一直處於重建期,尤其是當球隊管理架構開始轉向歐陸風格,主帥話語權更小,管理層嘅工作就變得更加重要。費格遜退休後,曼聯6年來已經於轉會市場上花費8.4億歐元,但金錢未能換嚟成績,多名新援都未能有出色發揮,成為曼聯CEO活華特 (Ed Woodward) 備受批評嘅原因之一。


曼聯執行副主席活華特近日接受訪問,否認自己主導球會買賣球員工作,但承認曼聯過去幾年引援工作有所不足。

活華特接受《United We Stand》訪問時表示:「球會嘅引援工作完全係由足球專家處理,我嘅工作係審批預算。領隊喺買賣球員方面擁有否決權,我哋絕對唔會簽入一位領隊表示唔會用嘅球員,不過同時我哋都認同引援部門嘅足球專家同樣應該有否決權。

我並唔係好似大眾諗咁樣牽涉入引援工作入面。有傳言話我會睇YouTube揀球員,我並冇咁做。觀察一位球員係一項藝術般嘅工作,我冇興趣咁樣做。

我只希望球會有一個有紀律嘅引援過程,因為當你花費一大筆金錢喺一位球員身上,就需要確保得到大部分正確嘅資訊。喺買人過程中,我只參與審批預算嘅工作,但當我哋有幾個轉會目標時,我會覺得先追求頭號目標,然後唔成功嘅時候向下追求二號、三號會比較好。

呢個系統喺過去並未正確確立起嚟,我哋有12位球探負責向1位首席球探報告,更多時候係用嚟篩選唔適合嘅球員,過去我哋曾經容許太多例外發生,但呢樣嘢已經改善咗。

近年,我哋需要承認引援工作未做到最好。我哋而家已經知道邊個係最可靠嘅球探。我哋嘅意念係喺保密嘅情況下完成收購,而唔係聽傳媒講,或者被唔同意見嘅經理人影響。我哋會嘗試只按照資訊做決定。

你哋可以喺下個轉會窗再審視我哋嘅引援工作,我哋希望可以將球隊帶到一個我哋心目中嘅水平。」


Source: FourFourTwo

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→