君子絕交,不出惡聲  艾馬利給阿仙奴的公開信:「但願為你們取得更好成績」

睇足365 於 01/12/2019 發表 收藏文章
阿仙奴與主帥艾馬利解約已成定局,雲加離任後,艾馬利的確曾經為阿仙奴帶來短暫嘅新氣象,代表作包括首季反勝熱刺、擊敗曼聯及車路士,不過球隊喺歐霸決賽大敗予車路士後,至今一直處於低谷,最近已連續7場比賽不勝。毫無疑問,艾馬利於PSG時無法處理尼馬及卡雲尼之爭,嚟到阿仙奴又出現雪藏奧斯爾、沙加隊長爭議等事件,反映佢於人員管理上有嚴重不足,可能係同佢自身背景或性格有關,而且佢喺成績上已經無法為阿仙奴帶來提升,換帥絕對係合理決定。不過,職業足球係英雄地,做唔掂要離開,亦可以好好睇睇,用專業嘅態度處理。呢一點,阿仙奴會方同艾馬利都同樣做得到。


正所謂「君子絕交,不出惡聲」 ,艾馬利離任後,於阿仙奴官網上刊登一封公開信,表現相當大方得體:

「能夠成為阿仙奴主教練對我嚟講係一個榮譽。

我要向所有球迷講,衷心感謝你哋令我感受到阿仙奴嘅偉大。喺全世界每個角落支持我哋嘅你,曾經嚟到酋長球場嘅你,曾經喺天雨同嚴寒之下等候同我打招呼嘅你,我希望話你哋知,我一直都帶著熱誠、決心同努力工作。

我只希望可以為你哋取得更好成績。

我亦都想感謝阿仙奴上下所有職員,你哋全部都對我好好。阿仙奴嘅偉大體現喺每一位職員,總監、行政人員、普通員工同埋義工身上。

我特別想多謝加齊迪斯 (Ivan Gazidis,前阿仙奴CEO) ,當初由佢歡迎我嚟到球會,仲有辛利耶 (Raul Sanllehi)、伊度 (Edu ) 同埋雲基森 (Vinai Venkatesham) 多謝你哋嘅尊重同協助。直至我喺球會嘅最後一分鐘,我都獲得大家嘅尊重同真誠對待。當然,我真切地感激高安基家族對我嘅信任。

呢一年半係充滿激情,亦有高山低谷,但我每一日都為自己可以同一班專業、有質素嘅球員一齊服務呢間球會而感到幸運。

球員一直都配得上佢哋身上嘅球衣,佢哋值得你哋繼續支持。

我喺球壇已經經歷好多,但我喺英格蘭同英超都享受同埋學到好多嘢。

祝你哋一切順利。槍手加油!」


48歲嘅艾馬利曾經率領西維爾取得三次歐霸冠軍,有一定實力,不過執教PSG及阿仙奴都未取得成功,今次有報導指艾馬利成績不濟嘅一大原因係語言問題導致溝通不良。相信艾馬利比較適合返回西班牙發展,執教一啲中型班應該仍有一定作為。

Source: Arsenal.com

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • ahbin
    ahbin 於 01/12/2019 評論 NO. 1

    睇落呢條友只適合教中型班, 上位教大巴黎/兵工廠有錢啲球會都係失敗收場...

快捷鍵:←
快捷鍵:→