各方齊撐梳爾!史高斯:佢離開摩連奴可以成為世界最佳、拿鐵斯:摩連奴摧毀緊佢

睇足365 於 20/03/2018 發表 收藏文章
曼聯左閘勞基梳爾 (Luke Shaw) 喺修咸頓時期已經成名,被視為未來英格蘭第一左閘。不過佢同好多「英格蘭新星」一樣,年少成名之後生涯漸走下坡,其他新星可能係態度累事,梳爾有冇呢個問題就唔知,但佢喺曼聯經歷斷腳嘅可怕經歷,不論係喺身體上、心態上、狀態上,都足以摧毀一個球員嘅生涯。


的而且確,梳爾從斷腳康復後,狀態係未如理想,亦係可以理解,但曼聯領隊摩連奴對待佢嘅方式又係咪合理,呢個完全係另一個問題。梳爾傷癒後喺2016-17季初再次為曼聯一隊上陣,但嗰季因為狀態及傷患反覆,只上陣過11場英超比賽,今季就只喺英超上陣7場,其餘喺聯賽盃、足總盃及歐聯共上陣8次,大部分時間都得唔到上陣機會。喺上一場足總盃比賽對白禮頓,梳爾正選上陣,半場就被摩連奴換走,更喺賽後直接公開批評梳爾進攻欠缺侵略性、防守又不斷讓對手出波。


最近,《Sky Sports》記者 Kaveh Solhekol 喺 Twitter 上引述一位梳爾身邊人士指,認為摩連奴對待梳爾嘅方式令人作嘔。


曼聯名宿史高斯都力捧梳爾,認為佢若果離開曼聯同摩連奴,可以成為世界第一左閘:

「我仍然相信佢可以成為世界最佳,如果佢今個夏天可以離開,去熱刺或者其他地方,佢就可以更進一步。

我睇唔到佢喺呢場波入面,同下半場入替嘅艾殊利楊格有咩分別。

我覺得有時候啲領隊會先入為主,覺得某啲球員就係唔啱自己用。對我嚟講, 佢係好出色,但領隊總會對佢喺雞蛋裡挑骨頭。咁係好令人失望,因為當呢個球員嚟到嘅時候,我哋都睇到佢有幾好,佢將來可以成為最強嘅球員。」

修咸頓名宿拿鐵斯就話,如果摩連奴留低,梳爾就應該走:

「我認為如果摩連奴繼續留喺度,咁梳爾今個夏天離隊係無可避免。我都唔明佢想做啲乜。佢哋嘅關係已經變得好古怪,而我完全唔明摩連奴做緊乜,因為佢只係摧毀緊個球員。」



拿鐵斯又表示,唔知道梳爾平時喺訓練中或者日常生活中做過啲乜,令摩連奴咁樣對待佢,但認為梳爾唔係嗰種喺呢個對待之下會越戰越勇嘅球員。佢又記得梳爾有一次喺修咸頓時期因為受傷而被換走,當時觀察到佢心理上的確係比較脆弱:「佢後來經歷嚴重傷患,心理上亦都似乎比較脆弱,但不論係唔係同佢傷患有關,作為領隊嘅責任就係要令球員發揮佢嘅潛能,但我唔覺得摩連奴做緊呢樣嘢。」

其實梳爾只係22歲,要進步成為頂級球員,其實仲有時間,與其喺曼聯做後備,出去尋求正選機會先係對佢發展最有利嘅一步。拿鐵斯就認為修咸頓應該出唔起人工簽返梳爾,而梳爾本人可能都會覺得返修咸頓係倒退,所以覺得佢去熱刺係最適合。

Source: Sky SportsGoal、BTSports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • tinchi3721
    tinchi3721 於 20/03/2018 評論 NO. 1

    講波佬講既野都係聽下好 去批評摩佬 我念最低限度先係以領隊角色拎次英超/西甲冠軍先

  • kinfung
    kinfung 於 20/03/2018 評論 NO. 2

    樓上都痴撚線,以樓上既邏輯,要以領隊身份拎過英超先有資格評摩佬既話,感啫系全世界九成九既球評家都冇資格評摩佬啦,感我衣家就同樓上講,你未踢過英超,冇資格話史高斯同拿鐵斯冇資格,下次你條獌狗再批評利記既話,我又會同你講,你未踢過英超,冇資格話利記海鮮。讀多幾年書再泥留言啦天才

  • wombat
    wombat 於 21/03/2018 評論 NO. 3

    師兄又唔使咁激動嘅, 雖然我都贊成你講嘅嘢🤣。同樣道理摩佬都應該唔可以鬧碌梳, 因為佢自己都冇 踢過國家隊左閘。

    其實摩佬都要與時並進,呢種家長式管教可能已經不合時宜,再咁固步自封可能步雲膠後塵

  • somewhere
    somewhere 於 21/03/2018 評論 NO. 4

    唔洗可能, 已經同雲膠一樣係過氣領隊

快捷鍵:←
快捷鍵:→