史高斯親領沙福特城,曼聯92班旗下球隊咩環境?

睇足365 於 18/10/2020 發表 收藏文章
好多球迷都知道,事實上唔少球壇名將其實教波都冇乜成績,英格蘭及曼聯名宿史高斯 (Paul Scholes) 去年就曾經擔任英乙球隊奧咸嘅主帥,但成績未如理想,僅僅一個月就宣布離隊,呢個亦係佢人生首次執教一支球隊。最近,史高斯再次執起教鞭,不過執教嘅球隊係自己旗下嘅沙福特城 (Salford City F.C.) ,結果又會如何?


英乙球隊沙福特城由一間名為Project 92 Limited嘅公司擁有,顧名思義係由人稱曼聯92班嘅名宿史高斯、加利尼維利、傑斯、畢特、碧咸等人擁有。沙福特城喺2014年曼聯92班入主時,處於英格蘭第7級別聯賽,傑斯喺接手時表示願望係15年內帶領沙福特城升到英冠,即第2級別。喺眾班主扶持下,沙福特城喺2018-19球季結束時已經實現第2次升班,2019-20開始喺第4級別嘅英乙作賽,進入職業聯賽級別。


今季開始時,沙福特城開季5場不敗,其中2勝3和,不過抱有雄心壯志嘅一眾曼聯名宿班主仍然對成績不滿,決定開除主帥格拉咸阿歷山大 (Graham Alexander),然後由班主之一嘅史高斯出任暫代領隊。史高斯領軍第一仗,沙福特城作客維爾港 (Port Vale),可惜球隊主力射手伊恩軒達臣 (Ian Henderson) 喺上半場射失12碼,最終被維爾港於86分鐘絕殺,反而吞下今季首場敗仗。

精華片段

沙福特城陣中擁有曼聯青訓出品占士威爾遜 (James Wilson)及同樣曾效力曼聯嘅失意軍人吉遜 (Darron Gibson) ,實力上喺英乙應該係綽綽有餘,但今仗除咗輸波之外,更有吉遜懷疑重傷離場,可謂前景堪憂。史高斯喺賽後表示,自己接手執教球隊只係幾日,不過球員已開始展現出教練團隊希望做嘅事,亦喺比賽中一啲時候踢出漂亮足球,「好明顯,我哋自己錯過咗12碼同補中機會,比賽尾段都有失機。我唔會對球隊表現太失望,我認為佢哋正努力以我哋希望嘅方式踢波。當然呢個比數唔係我哋想要嘅嘢,但喺呢個聯賽我哋星期六同星期二都要比賽,我哋需要及時振作,希望星期二可以擊敗修安聯。」



其實,45歲嘅史高斯並冇足夠執教經驗,佢去年首次出任主帥,執教同樣係英乙嘅奧咸,但7戰只得1勝,更稱受到班主干涉工作,一個月就離職,說服力欠奉。當然,今次成敗言之尚早,但史高斯以班主身份出任暫代領隊,直接實行「老細足球」,缺乏監督 (其實亦要向其他班主交代),更加要知所進退,如感到無力協助球隊就應退位,同時盡快為球隊覓得長遠人選。


據Manchester Evening News報導,沙福特城二隊教練Warren Joyce現時暫時升任一隊臨時助理領隊協助史高斯,佢亦曾經執教曼聯二隊、韋根及墨爾本城,同時係下任沙福特城領隊大熱。另一位大熱人選係曼聯名宿堅尼,佢喺今場比賽被發現於看台現身,唔係班主之一嘅佢有可能應前隊友邀請出任主帥。其他熱門人選包括史高斯本人及前韋根領隊保羅曲克 (Paul Cook)。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→