又係前阿仙奴……費林邦27歲宣布退役,究竟呢幾年搞乜?

睇足365 於 08/03/2019 發表 收藏文章
阿仙奴似乎同「傷兵」二字總係拉上關係,不但經常有主力球員重傷,亦一直有好多因為長期傷患而冇辦法發揮實力或潛力嘅球員,路斯基、卡蘇拿、迪亞比呢啲球員喺健康之下都公認為好波之人,但路斯基同迪亞比就算離隊後亦好快黯然退役,卡蘇拿就重獲新生令人欣慰。「潛力股」方面,韋舒亞固然係近年純正阿仙奴青訓出品中最受期待之人,佢健康時的確有好表現,但今季即使轉投韋斯咸仍難逃長唞嘅命運。不過近期最令人意外,應該都係費林邦竟然以27歲之齡就宣布退役。


阿仙奴青訓出身嘅費林邦 (Emmanuel Frimpong) 喺一隊出道之時,曾經背負著大期望,因為佢係當時阿仙奴陣中罕有地有活力而且球風狠辣嘅「野獸型」防守中場球員,縱使佢足球智慧真係麻麻,有時會因為魯莽攔截而領牌,仍然有球迷期望佢終有一日成長為主力防中。不過估唔到,費林邦離隊後顛沛流離,無法喺主流聯賽立足之餘,竟然喺27歲就要掛靴。究竟費林邦呢幾年經歷咗啲咩呢?



費林邦喺2011-12球季已經為阿仙奴一隊於聯賽、歐聯等賽事上陣,之後經歷外借到狼隊、查爾頓及富咸嘅日子,但上陣機會唔算特別多,更喺狼隊再次整傷十字韌帶,令之後表現大受影響,最後喺2014-15球季初正式離隊轉投英冠班士利,阿仙奴生涯共上陣16場英超。


費林邦喺班士利仍然未能站穩主力位置,全季只上陣9場聯賽,結果喺季後加盟俄超球隊烏法 (FC Ufa) ,但效力兩季就因為種族歧視風波等問題不歡而散,自由身轉投「俄超阿仙奴」圖拉兵工廠 (Arsenal Tula) ,最後流落瑞典超球隊艾斯基斯杜拿 (Athletic Football Club Eskilstuna) 甚至塞浦路斯球隊 Ermis Aradippou 。


按當時印象,費林邦未能喺英超立足係合理,但好難想像佢連英冠、英甲都冇得踢,要去到瑞典、塞浦路斯呢啲地方。費林邦表示,過去五年一直受到膝部傷患困擾,雖然一直努力嘗試回歸職業足球,但由2017年11月起已經因為膝部韌帶撕裂而冇再踢波,佢更加決定唔做手術,因為多年嚟嘅痛楚已經令佢無法再享受足球,所以決定提早掛靴,同家人享受生活。


的確,作為一位以大範圍覆蓋跑動為本錢嘅防守中場,十字韌帶傷患嘅纏繞,足以嚴重影響佢嘅發揮,甚至摧毀佢嘅職業足球生涯。同樣受長期傷患困擾嘅韋舒亞都喺twitter上向呢位青訓同學致意。


Source: Sky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→