厄運快走吧!法林明高青年軍宿舍火災,釀10死3傷包括9名小將

睇足365 於 08/02/2019 發表 收藏文章
最近球壇接連發生不幸事件,由南特轉投卡迪夫城嘅伊美利安奴沙拿趕往新球會途中飛機失事,今日被證實身亡,不料喺地球另一邊,巴西亦發生同足球有關嘅人命傷亡事件,希望厄運盡快遠離!


根據報導,巴西球會法林明高嘅青年訓練中心,於當地時間2月8日星期五清晨5時發生火災,事發時留宿球員正於睡夢中,消防超過兩小時後將火救熄,火災釀成至少10死3傷。初時有消息指所有死傷者均為青年軍球員,但《BBC》指出,死者身分暫時仍未能完全確定,據報當中有6人係介乎14至16歲嘅法林明高青年軍球員,另外4名死者相信係訓練中心職員,至於3名傷者亦係14至16歲球員,其中一名15歲傷者證實嚴重燒傷,已轉送專科醫院救治。


《路透社》消息指,事發位於里約熱內盧嘅青年訓練中心 Ninho de Urubu 去年由法林明高斥資約480萬美鎊完成大型擴建工程。暫時未有任何關於起火原因嘅消息,但《BBC》引述巴西傳媒消息指,當地最近剛受到暴風雨吹襲 (暴風雨亦不幸造成該區最少6人死亡),有可能令訓練中心停水停電。

法林明高暫時並未發表任何聲明,只喺社交網絡上發表一張黑色背景圖片,表示哀悼。


法林明高屬巴西傳統勁旅,曾經五度贏得巴甲冠軍,現時有秘魯隊長荷西古里路、前國腳中場迪亞高、前華倫西亞門將迪亞高艾維斯及國際米蘭借將加比爾巴保沙效力,正處於巴甲聯賽榜次席,本來將會喺周六同富明尼斯上演打吡戰,但賽事已宣布延期,多間球會向為事件哀悼。曾經效力法林明高嘅朗拿甸奴、白必圖、薛高、羅馬里奧等巴西名將分別喺社交網絡上表示震驚及悲傷,皇家馬德里新星雲尼斯奧斯亦為母會祈禱。




BBC新聞片段

最近球壇已發生不少令人悲傷嘅事件,包括李斯特城班主維猜及卡迪夫城前鋒伊美利安奴沙拿分別墜機身亡,而牽涉巴西足球嘅不幸事件,仲有兩年前嘅查比高恩斯空難造成71人死亡,只有6人逃過大難。

Source: BBCGuardian

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→