卡域克自傳親述:要不是法比加斯,我已加盟阿仙奴!

睇足365 於 11/10/2018 發表 收藏文章
現時喺曼聯教練團任職嘅卡域克,生涯效力過熱刺同曼聯,一隊係阿仙奴嘅北倫敦打吡對手,另一隊亦係阿仙奴嘅死敵,佢似乎同阿仙奴扯唔上關係,但最近就喺自傳入面話,當年曾經極有機會加盟阿仙奴,結果未能成事令佢十分失望。

37歲嘅卡域克,將會喺今個月推出自傳《Michael Carrick: Between the Lines: My Autobiography》,雖然新書仲有幾日先正式出街,但《Goal》就有文章率先披露其中一段卡域克球員生涯嘅小插曲,就係佢同阿仙奴嘅關係。


喺2003-04球季,卡域克由青年軍起效力嘅韋斯咸正征戰仍然係次級聯賽嘅英甲 (當時英甲聯賽相當於今日嘅英冠聯賽,第一屆英冠聯賽於2004-05球季揭幕)。喺球季結束後,一方面卡域克已經唔願意踢次級聯賽,另一方面韋斯咸亦希望將佢套現求利。當時卡域克同樸茨茅夫、水晶宮等球會都拉上關係,不過喺自傳中表示,自己一度有機會加盟阿仙奴。


「我同經理人揸車返屋企時收到電話,阿仙奴邀請我哋同雲加見面。當時我哋剛好經過雲加位於北倫敦嘅屋企附近,於是我哋就順便上門拜訪雲加。一個鐘頭之內,我就身處雲加嘅客廳,我喺度搣自己,簡直唔敢相信。係咪真㗎,阿仙奴喎!我真係可以加盟呢支啱啱不敗奪冠嘅球隊?」

「我哋同雲加傾咗大約一個鐘關於足球嘅嘢。雲加嗰個星期要帶隊踢社區盾,但都肯花一個鐘同我見面,所以我肯定佢真係有興趣簽我。雲加最後同我講踢完社區盾之後,星期一再同我見面。」

卡域克話當時十分興奮,因為阿仙奴當年喺英超唔係排第一就係第二位,然後佢喺星期日專登喺屋企打開電視睇社區盾阿仙奴對曼聯,關注自己未來嘅球隊。卡域克記得當時睇到17歲嘅法比加斯取代韋拉正選上陣,嗰場波法比加斯表現十分好,但卡域克冇諗太多,之後都喺度等阿仙奴嘅電話。


「我等極都等唔到個電話,去到第二日,我要返去韋斯咸練波,途中收到經理人電話,佢話接到大衛甸恩 (David Dein,時任阿仙奴副主席) 嘅電話,大約係咁講:『唔好意思呀,雲加話我哋唔需要卡域克喇,因為法比加斯同佢類型好接近。真係唔好意思,交易要取消喇』」

其實法比加斯喺2003-04球季初段已經喺聯賽盃中上演地標戰,打破隊內最年輕一隊上陣紀錄,不過就未踢過聯賽。去到社區盾對曼聯,雲加見到法比加斯表現出色,足以應付英超水平賽事,又覺得佢同卡域克踢法有相似嘅地方,所以改變主意放棄簽入卡域克。

卡域克回憶話當時對於無緣加盟阿仙奴、同一眾不敗功臣踢波,感到極度失望,不過好快就收到熱刺邀請。結果,卡域克喺熱刺效力兩年,然後喺2006年加盟曼聯並效力直至2018年退役。


Source: Goal

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→