【勾義嫂事件】麥斯盧比斯稱已原諒伊卡迪:「我要多謝佢帶走Wanda」

睇足365 於 18/10/2019 發表 收藏文章
今時今日,男女關係離離合合相當平常,不過如果涉及出軌,而且對象係「朋友妻」,事情就會變得相當尷尬。事實上,球壇中亦不乏類似事件,其中麥斯盧比斯 (Maxi Lopez) 同伊卡迪 (Mauro Icardi) 呢對「襟兄弟」就係近年相當經典嘅花邊新聞,新一輩中亦有迪布尼同古圖斯曾為同樣問題鬧出不快。


相比迪布尼同古圖斯喺比利時國家隊仍繼續做隊友,麥斯盧比斯同伊卡迪就大件事好多。2012-13球季,係阿根廷前鋒麥斯盧比斯同伊卡迪唯一嘅交叉點,兩人一同效力意甲球隊森多利亞。麥斯盧比斯喺2013年同阿根廷藝人Wanda Nara離婚,Wanda隨即於半年內同伊卡迪成婚。據講,Wanda與麥斯盧比斯離婚之前,已經同伊卡迪搭上兼發生關係,結果麥斯盧比斯同伊卡迪鬧翻。其後,伊卡迪轉投國際米蘭,對森多利亞時,麥斯盧比斯拒絕握手,成為一時熱話。有傳聞指,呢件事令伊卡迪喺阿根廷球員中形象插水,令過去6年嚟為國米射入111個聯賽入球嘅佢未獲國家隊重用。



現年35歲嘅麥斯盧比斯今季由巴甲「回流」意大利,加盟意乙球隊克羅托內,佢最近接受訪問,坦言已經放低當年恩怨,唔再對任何人抱有怨念,會向前看及快樂過生活。
引用"Yeah, I do not have any problems with anyone.

"Speaking as a human being, all I want is to find a way to make my children happy, that is the only objective I have.

"As for everything else, that is something that already happened.

"I turned the page on that a while ago and it does not affect me in any way."

不過,有傳媒就喺麥斯盧比斯嘅Instagram上搵到佢喺近日出post表示 “I don’t just forgive Mauro, I thank him for taking W away…” 即係話多謝伊卡迪帶走Wanda。

其實 Wanda Nara 近年亦相當具爭議,傳聞中,兼任伊卡迪經理人嘅佢,近年經常慫恿伊卡迪鬧離隊,成為決定伊卡迪轉會去向嘅關鍵人物,令坊間出現不少批評,認為伊卡迪職業生涯受到太太拖累。未知麥斯盧比斯嘅多謝,係唔係認為Wanda的確係「麻煩友」?

話說回來,其實當年 Wanda Nara 亦有指控麥斯盧比斯偷食在先,伊卡迪亦表示國米前輩辛尼迪、甘比亞素、迪亞高米列圖等可以證明自己並未勾引有夫之婦。

Source: SportbibleFootball-Italia

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→