「功夫拿」玩完!踼球迷被馬賽炒魷魚,36歲失業兼全歐停賽

睇足365 於 11/11/2017 發表 收藏文章
之前同大家跟進過前曼聯左閘艾夫拿 (Patrice Evra) ,喺馬賽嘅一場歐霸盃比賽熱身時間裡面,同自家球迷發生衝突,並且以「功夫腳」踢向球迷頭部,佢不僅當場俾球證出示紅牌趕出場,事後仲俾馬賽會方無限期停操停賽,而且結果仲被名宿講中,得罪馬賽球迷一定冇得留低!


事件係發生喺香港時間11月3日清晨,歐霸盃分組賽 I 組比賽,葡超球隊甘馬雷斯對法甲球隊馬賽嘅熱身時段。根據法國傳媒《隊報》嘅報導,有馬賽球迷不滿艾夫拿嘅表現,於是唱歌仔批評佢,內容包括有「滾出馬賽」同「返去拍片啦」之類,諷刺艾夫拿波都未踢好仲掛住玩Instagram。

loading


艾夫拿貴為前法國隊長,可能好少俾人咁樣鬧,惱羞成怒嘅佢拎個波踼向看台上嗰班球迷,然後雙方發生衝突,艾夫拿就出拳兼起腳踼人。

loading


上一次就同大家提到,曾經為馬賽上陣84場射入61球嘅前馬賽前鋒加斯卡連奴 (Tony Cascarino),跟據自己喺馬賽生活兩年嘅經驗,認為無論球迷對艾夫拿做咗啲咩都好,艾夫拿一出手就注定冇得留低,因為喺馬賽不嬲都係球迷大晒,特別係呢啲跟住球隊作客嘅死忠球迷,所以連球會都保佢唔住。

loading

結果,艾夫拿嘅下場俾加斯卡連奴不幸言中,馬賽最近發出官方聲明,表示已經同艾夫拿達成共識,宣佈同艾夫拿解除合約,而且唔會作出任何賠償。馬賽嘅官方聲明當然都有循例譴責下鬧事嘅球迷,但明眼人都睇得出,處理得最唔好、而且最蝕底嘅一定係艾夫拿啦。

除此之外,歐洲足協UEFA都宣佈咗對艾夫拿嘅處罰。佢不但被罰款25,000歐元,並需要為球迷對甘馬雷斯主場造成嘅破壞負責賠償之外,更加被判以全歐禁賽至2018年6月30日。即係話,失業嘅艾夫拿全個球季都唔可以再喺任何歐洲球隊踼波,對於36歲嘅佢嚟講一定係重大打撃。

Source: ESPNReuters

如果喜歡我們的文章,請即分享到︰

標籤: 艾夫拿  馬賽  歐霸  曼聯  簡東拿  

留言


請按此登錄後留言。未成為會員? 立即註冊
  • 聖卡西 於 12/11/2017 評論 NO. 1

    好想睇蘇亞雷斯咬佢功夫腳

快捷鍵:←
快捷鍵:→