傳「新卡卡」一月加盟AC米蘭 法林明高總監證實或於兩周內簽約

睇足365 於 11/10/2018 發表 收藏文章
每次談及「新乜乜」,一定會引起爭議,不過先「利申」呢個「新卡卡」稱號絕對唔係小弟老作,只要大家喺google上用keyword "new kaka" 搜尋,頭幾個結果應該都會搵到呢位仁兄——Lucas Paqueta。


效力巴甲球隊法林明高嘅盧卡斯柏基達 (Lucas Paqueta) 現年21歲,司職進攻中場,2016年首次為一隊上陣,今屆世界盃前獲選入巴西國家隊12人候補名單中,今年8月正式得到大國腳征召上陣踢友誼賽。今季於巴甲上陣24場,貢獻9入球2助攻,表現出色。盧卡斯柏基達盤扭、突破、處理死球能力出眾,至於風格上有冇卡卡嘅影子,就留俾大家判斷。


作為一位年僅21歲嘅球員,能力上當然無法同卡卡相提並論,但呢個年紀睇嘅係潛質,起碼佢已經受到巴黎聖日耳門、巴塞隆拿等歐洲大球會嘅注目。不過根據最新消息,佢嘅下一站好有可能係AC米蘭,關鍵係「大師兄」李安納度 (Leonardo Araújo)。


現任AC米蘭體育總監李安納度,球員時代係巴西國腳,佢正正係法林明高青訓出品,又曾經效力AC米蘭,佢可以說服盧卡斯柏基達加盟AC米蘭絕對合情合理。根據《ESPN》報導,李安納度正促成呢筆交易,而且消息來源透露AC米蘭已經同意出資 3,500萬歐元收購盧卡斯柏基達,待球員進行體測後簽約,就可於一月轉會窗正式加盟。


法林明高體育總監Carlos Noval接受訪問時,就表示交易並未落實,但可以確認雙方正在談判,並且估計交易有機會於兩星期內完成,或者再多幾星期就可以落實。

AC米蘭今季暫時表現平平,開季7場意甲取得3勝3和1負,排聯賽第10位。暫時擁有2次大國腳上陣經驗嘅盧卡斯柏基達,今個國際賽期並冇入選,據報原因係要為球會上陣今個星期六巴甲聯賽。

有興趣了解更多嘅球迷可以參考以下一段由Tifo Football製造嘅介紹短片,裡面講到,盧卡斯柏基達喺比賽中對空間嘅觀察十分出色,喺球隊攻守銜接上十分重要:


Source: ESPNGoalcalciomercato

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→