傳雲邦美欲簽洛賓重返PSV,掛靴意願成最大障礙

睇足365 於 14/12/2018 發表 收藏文章
德甲班霸拜仁慕尼黑今季表現不穩,外間有不少評論直指問題核心係新帥尼高高華未能處理世代交替問題,尼高高華於拜仁的確與以往敢於革新求變嘅風格截然不同,或因拜仁陣中老將於更衣室擁太大話事權,或因拜仁高層未有全力支持尼高高華大刀闊斧。即使洛賓、列貝利等老將仍有力一戰,拜仁已不適宜再倚賴佢哋,結果洛賓近日宣布將於季後約滿離隊,結束10年拜仁生涯,而列貝利、謝路美保定等老將亦隨時需要走人。


洛賓落實離隊,但暫時未有明確消息得知呢位34歲翼鋒將會情歸何處,但傳聞中佢好大可能將會重返荷甲,完成球員生涯最後嘅旅程。

近日,洛賓其中一個潛在下家PSV嘅主帥雲邦美,曾經聯絡洛賓,邀請佢來季重返PSV。41歲嘅荷蘭名宿雲邦美同洛賓不但係前國家隊隊友,亦曾經於PSV及拜仁兩度合作,交情匪淺,前者2013年退役後曾出任荷蘭U17助教、沙地阿拉伯國家隊助教、PSV青年軍教練及奧地利國家隊助教,2018年夏天出任PSV主帥,現時球隊正以2分差距佔據荷甲榜首。


PSV總經理 Toon Gerbrands 接受訪問時稱:「冇錯,我哋有聯絡洛賓。雲邦美作為洛賓嘅前隊友,向佢發出訊息。當然,加盟與否完全係洛賓自己嘅決定。」

假設洛賓有意回歸荷甲,PSV唔係佢嘅唯一選擇,佢亦可能選擇重返母會格羅寧根,但暫時未有消息指格羅寧根邀請洛賓回巢,而且雲邦美嘅邀請及PSV近四季三奪荷甲冠軍嘅佳績相當吸引。


不過,洛賓嘅前程仲有一個不明朗因素,就係佢嘅掛靴意願。洛賓早前接受訪問時曾經表示,退役都係佢其中一個選項:「可能我會選擇停落嚟。如果我收到邀請,能夠100%說服我的話,我會繼續踢。如果收唔到理想嘅邀請,咁我就可能會終止我嘅球員生涯。」

Source: GoalGoalFoxSportsDailyMail

留言


請按此登錄後留言。未成為會員? 立即註冊
    快捷鍵:←
    快捷鍵:→