傳奧斯爾將赴土超，阿仙奴貼錢照放

德國籍球星奧斯爾今年喺阿仙奴嘅處境備受關注，佢由上季英超復賽之後開始，已成為隊中「失蹤人口」，到今季初更不獲於英超及歐霸盃註冊，令人聯想到背後原因有機會係同佢去年發表政治言論或於武漢肺炎期間不願減薪有關，總而言之就係得罪人。一月轉會期已經展開，有傳奧斯爾即將前往土耳其發展。


根據土耳其傳媒DHA Spor報道，阿仙奴已經與土超球隊費倫巴治達成協議，將現年32歲嘅奧斯爾送到該隊，而奧斯爾將會與費倫巴治簽約3.5年，其中頭半年薪金由阿仙奴支付。事實上，奧斯爾與阿仙奴合約剩低半年，因此阿仙奴無論如何都要支付餘下半年薪金，而喺阿仙奴立場嚟講而家送走奧斯爾起碼算係為整個風波劃上句號，早前傳聞隊內有球員要求球會將奧斯爾重新註冊嘅事件，亦會隨住轉會而告一段落；對於奧斯爾，既然無論如何都有糧出，有比賽機會仍然係好事 (假設絕大多數職業足球員都想落場踢波)，所以一旦呢個轉會成立，雖然稱唔上係雙贏 (畢竟奧斯爾係被逼走)，但始終算係一個解脫。另一方面，奧斯爾係土耳其裔，亦同土耳其總統埃爾多安關係密切，令佢轉赴土超嘅呼聲更被睇高一線。


不過以上只係其中一個似層層嘅傳聞，最近亦有指美職聯球隊華盛頓聯有意簽下奧斯爾，據報呢隊曾簽下前曼聯隊長朗尼嘅球隊，曾與奧斯爾進行談判，而奧斯爾亦有可能因為商業因素而考慮轉到美國發展，因為佢希望為旗下「M10」品牌開拓市場，消息獲得美職聯官網轉載。


另外，阿仙奴亦積極「清人」，年輕中堅沙列巴日前已被外借到法甲尼斯，而另一名同樣冇被註冊嘅球員柏柏斯達夫普路斯，就有傳將會加盟意甲熱那亞，同時拿玻里、費倫巴治、奧林比亞高斯亦屬傳聞有意羅致柏柏斯達夫普路斯嘅球會。