【做乜勁？】頹爆史篤城求職網登廣告請球員　薪金可議、曾有歐聯歐霸經驗更佳精選

由睇足365 於 12/01/2019 發表收藏文章

冇錯，足球員都係一種職業，當然不時都會有球員通過自薦、試腳等程序，搵到班落。不過喺水平較高嘅聯賽入面，呢個情況就相對罕見喇，因為去到呢個規模嘅球會，通常會透過球探去搵合適嘅球員，亦有經理人鋪橋搭路，又點估到曾經喺英超屹立多年嘅老牌球會史篤城，竟然要喺求職網站上面登廣告請球員呢？

按此觀看圖片

今季征戰英冠嘅史篤城，單睇戰績，唔可以話係奇差，佢哋喺聯賽26戰取得8勝11和7負，以35分暫時排第14位 (截至第26輪)，同升班附加賽區域相差8分。不過有鑑於佢哋嘅陣容保留大量英超時期嘅球員，喺英冠理應屬於頂級行列，例如畢蘭特 (Jack Butland) 、隊長梳高斯 (Ryan Shawcross) 、祖亞倫 (Joe Allen) 、艾殊利威廉斯 (Ashley Williams；由愛華頓外借) 、艾費利 (Ibrahim Afellay) 、保贊 (Bojan) 、彼達斯 (Erik Pieters) 、馬田斯恩迪 (Bruno Martins Indi) 、查利亞當 (Charlie Adam) 、馬美迪奧夫 (Mame Biram Diouf) 、比拉軒奴 (Saido Berahino) 、高治 (Peter Crouch) 、費查 (Darren Fletcher) 等，每一個都係國腳級/前國腳級/前英超球員，相信史篤城說服呢班球員留效時一定許諾齊心用一季時間重返英超，呢個班底、呢個成績，踢到勉勉強強咁，實在冇辦法收貨。

按此觀看圖片

另外，史篤城近日先宣布同主帥洛維治 (Gary Rowett) 解約，係包括2018年1月解僱曉士 (Mark Hughes) 以嚟，一年內第三次炒領隊，曉士之後有林拔 (Paul Lambert) 及洛維治各教半季，已反映史篤城內部混亂，藥石亂投。

按此觀看圖片

一月轉會窗開啟，史篤城竟然發揮創意，喺網上公開招募，如果請嘅教練團隊就冇咩稀奇，但佢哋竟然係公開招募球員。喺一個足球界嘅 JobsDB 類網站 DB Sports Agency 上面，有唔少球會刊登招聘教練團隊、物理治療師、球探等啟事，但請球員真係罕見。2日前，史篤城一口氣喺 DB Sports Agency 上面登咗3個位置嘅球員招聘廣告，分別係中堅、翼鋒及前鋒，一齊睇下有咩條件：

按此觀看圖片

史篤城註明球隊目標係爭取升班，要搵一位第四中堅，人選必須擁有英冠或相等經驗、身體強壯、今個轉會窗內轉會，借用或免費轉會為佳，如果擁有歐聯歐霸經驗或國腳經驗更佳，薪金可議。講明先，應徵者要連埋「球王片」(playing footage) send去先會考慮。

另外，史篤城仲搵緊一位快速翼鋒，同埋一位強壯中鋒，唔知有冇人send CV 去應徵呢？

按此觀看圖片

究竟史篤城係真心定假膠？冇人知道，如果係公關活動的話，佢哋應該會將呢件事放喺 Twitter 上面，但又冇咁做。不過，呢件事的確幾搞笑同埋吸引到人注意，所以一定有效果，起碼有球員經理人見到，就可能會介紹球員俾佢哋。

按此觀看圖片

順帶一提，史篤城日前宣布委任45歲嘅尼敦鍾斯出任領隊，呢位教頭雖然本來只係執教更低組別嘅盧頓 (Luton Town) ，但佢上季帶領球隊由英乙升上英甲，球隊今季更以升班馬身分暫時排聯賽第二位，26場攻入49球，屬英甲之冠，難道史篤城希望佢可以幫手加強攻力？