保頓情況跟進:終完成賣盤手續,無兵無帥-12分護級路難行

睇足365 於 29/08/2019 發表 收藏文章
過去幾日,本欄為大家跟進英格蘭老牌球會保頓面臨被逐出聯賽嘅消息,保頓早前被英格蘭聯賽會 (English Football League,EFL) 下達14日賣盤限期,否則將被逐出職業聯賽。今日,保頓賣盤完成,獲准保留EFL資格,但復興之路仍遙遙無期。


因管理不善而陷入財困嘅英格蘭球會保頓,上季由英冠降落英甲,球季中後段已多次拖欠職球員薪金,球員發起罷踢抗議,季尾更被勒令進行財務接管,須以-12分開始今個英甲球季。早前,賽會 EFL 向保頓下達最後14日限期,如未能完成賣盤或未能證明球會有力維持2019-20球季運作,將如期取消其EFL會籍。同時,同樣財困嘅貝利已經被取消會籍,被逐出英格蘭職業聯賽系統 (第2-4組別) ,預計即使成功「復活」,亦要喺來季由第7至第8組別聯賽重新起步。 (另有報導指,貝利已覓得資金支持,正對EFL提出上訴)

loading

今日,保頓官方發表聲明,宣布 Football Ventures (Whites) Limited 已正式收購球會,並獲得EFL確認成為球會管理人,會籍得到保留。

於財務接管期間管理球會嘅聯合管理人 Paul Appleton 表示:「呢個係我個人遇過最複雜嘅管理情況。

我好高興可以宣布,我哋終於同 Football Ventures (Whites) Limited 完成令人滿意嘅賣盤談判。有時候,一啲障礙似乎無法克服,挫折感極大,尤其係對不得不忍受太多不確定性嘅球迷嚟講。」

聯合管理人 Paul Appleton 又感謝已故前班主Eddie Davies家族信托基金 (the Eddie Davies Trust),以及球會法律團隊,球員工會及EFL,協助完成今次交易。佢指出,Eddie Davies Trust為咗球會存亡而作出妥協,成為推動成功交易嘅一大助力。 (事實上,已故前班主Eddie Davies生前多次以私人名義向球會注資及借貸。 Paul Appleton 又指責上任班主 Ken Anderson 阻撓交易完成。

loading

新班主 Football Ventures (Whites) Limited 就於聲明中表示,將會全力協助呢間老牌球會重振聲威,向球迷、職員及球員保障球會未來,而首要任務就係覓得新主帥以及可以帶領球會前進嘅球員。

的確,保頓今次雖然倖免於難,但前景毫不樂觀。今季,佢哋已經要以-12分開季,更因為冇錢出糧而令大部分一隊球員離開,據報現時僅有5名一隊級數嘅場區球員 (out-field players) ,上一輪英甲比賽更有多達8名年輕球員上演處子戰,以0-5不敵葉士域治。賽後,主帥Phil Parkinson及其助手隨即宣布離職。


英格蘭聯賽夏季轉會窗早已完結,因此保頓現時只可以簽入自由身球員 (現階段自由球員選擇亦十分有限,希望可找回部分仍未落班嘅原球員),配合原有U23及U18球員班底,至少需要捱半季,要於英甲護級難度已經極高,再加上已被扣12分,如果保頓最終可以成功護級,簡直可以話係奇蹟。保頓開季四場取得一分,以-11分包尾。


Source: Sky Sports、BoltonFC

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→