你唔識用,我識 瑞士傳媒稱干地有意邀格列沙加轉會國米

睇足365 於 05/06/2019 發表 收藏文章
阿仙奴中場格列沙加 (Granit Xhaka) 自2016年加盟以嚟,一直成為部分阿仙奴球迷口誅筆伐嘅目標,認為佢防守能力不足,個人整體速率偏慢,更多次失誤導致球隊輸波。不過,沙加作為瑞士國家隊必然正選,又係前慕遜加柏隊長及前最佳球員,自有過人之處。畢竟足球場上變化甚多,聯賽環境、球隊踢法、領隊指令、場上拍檔等等多個因素都會影響球員表現,因此亦有一部分阿仙奴球迷拒絕將球隊成績歸咎於沙加。


沙加上星期於歐霸決賽飲恨後,表示對戰果十分失望,明言自己嘅目標係繼續改善自己嘅傳送質素,以及更為進取地為隊友創造機會。被問到假若隊長哥斯尼於夏天離隊,而阿仙奴授予球會隊長身分的話會有何心情,沙格坦言呢個係莫大嘅榮譽。事實上,沙加曾經戴上瑞士國家隊、慕遜加柏及阿仙奴嘅隊長臂章。

不久之後,沙加返回瑞士參加國家隊集訓,佢哋將會喺稍後出戰歐洲國家聯賽四強。瑞士傳媒《RSI》記者 Marcello Ierace 表示,喺瑞士國家隊採訪期間,得到消息指沙加接近加盟意甲球隊國際米蘭,談判進度更因干地落實上任成為國米主帥而加速。《RSI》更表示,沙加拒絕否認有關傳聞。


的確,沙加被安排擔任墮後單中場時,防守漏洞甚大,因為佢移動速率不高,覆蓋範圍十分有限,又缺乏單對單突破能力,令佢好容易失誤,成為罪人。慕遜加柏時期,佢身邊都需要有如達侯特之類較具活力嘅中場跑動,先可以發揮威力。喺阿仙奴,如果佢身邊有托利拉同場執漏,亦可以淡化佢嘅弱點。只要配以適合嘅球隊節奏及中場拍檔,佢仍然係可以展現實力,所以係「說明書」嘅問題。如果沙加轉戰意甲的話,相信嗰度嘅行軍速率應該會比較適合佢。不過現時仍然係傳聞階段,暫時未有關於進度及轉會費嘅消息。

Source: RSI、arseblogfootball-italia

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→