今次應該好啱佢!又傳雲加出山教國家隊

睇足365 於 31/07/2021 發表 收藏文章
前阿仙奴領隊雲加於2018年離任之後,一直未有再執教其他球隊,但近三年來從不缺席各大球會教練嘅「傳候選人」名單,仿佛一有教練空缺,就關佢事。當年雲加「險簽」球員無數,現時亦被不少傳媒話佢被某某球會「險簽」。難得沉寂一時,近日又有傳雲加成為某球隊主帥大熱人選,一齊睇下咩料?


話說喺剛剛踢完嘅歐國盃之中,瑞士戰至8強互射12碼不敵西班牙惜敗,佢哋表現相當值得讚賞,執教球隊5年嘅主帥柏高域 (Vladimir Petkovi) 亦被挖角,轉到法甲執教波爾多。


不過,瑞士仍然要為2022世界盃入場券努力,佢哋身處世界盃歐洲區外圍賽B組,同組有意大利、北愛爾蘭、保加利亞及立陶宛,瑞士兩戰全勝得6分,意大利亦3戰全勝得9分,第一圈外圍賽共踢10輪,小組首名直接晉身世界盃決賽周,次名就要再過關斬將,循附加賽取得世界盃入場券。總之,瑞士現時主教練出缺,但急需一名經驗豐富、可「即食」嘅教練帶領佢哋喺今年年底至明年年初出戰世界盃外圍賽,當然如果順利出線要帶埋世界盃。

因此,瑞士傳媒Blick表示,瑞士國家隊迅速瞄準前阿仙奴領隊雲加,成為候選人之一,但就冇提及雲加意下如何。原來,瑞士國家隊早於1995年已曾邀請雲加執教,但當時正執教日本球隊名古屋八鯨嘅雲加不願離隊,一年後雲加就開始長達22年嘅阿仙奴生涯。講起都有趣,球迷成日笑雲加講某某球星十幾歲時已經留意人哋,原來雲加都俾人吼住咗廿幾年!


的而且確,雲加對瑞士國家隊嚟講係好選擇,首先瑞士喺法國隔離,法語亦係瑞士官方語言之一,雲加更加係球壇公認嘅語言天才,瑞士人常用語言法語、德語、意大利語都難唔到雲加;第二,普遍相信瑞士國家隊今次聘用新主帥係短約性質,教到世界盃完結再睇表現續約,已經執教緊球會嘅教練相信興趣不大,市面上能夠同瑞士一拍即合嘅名牌教頭,相信都無出其右,加上喺瑞士國家隊地位舉足輕重嘅格列沙加,係雲加一手由慕遜加柏買到阿仙奴,掌控球隊完全冇難度。


最大問題就係雲加本人嘅意願,因為喺呢三年當中,雲加曾經唔止一次接受訪問時承認有球隊邀請佢執教,但佢選擇專注於FIFA全球足球發展總監嘅工作,唔知今次又請唔請到雲加出山呢?

Source: Blick, Sportbible, Daily Mail

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→