【亞洲盃】一球「的波」倒掛、一球世界波大勝日本 卡塔爾整屆賽事失一球歷史性首奪亞洲盃

睇足365 於 02/02/2019 發表 收藏文章
香港時間2月1日22:00,2019亞洲盃決賽於阿聯酋阿布札比上演,由曾經四奪亞洲盃冠軍嘅日本對從未奪冠嘅卡塔爾。賽前數據,除咗有卡塔爾從未奪冠之外,亦有日本四次殺入決賽每次都捧盃而回嘅紀錄。不過,紀錄係要嚟破嘅……


開賽階段,卡塔爾入局較快,已經採取主動,比賽12分鐘,位居本屆賽事射手榜首位嘅卡塔爾前鋒艾莫爾茲阿里 (Almoez Ali) 接應傳中,背身「的波」,一「的」、兩「的」,第三下施展倒掛金勾,日本門將權田修一落地稍慢,皮球飛向右下角彈地入網,艾莫爾茲阿里以一個絕妙入球先開紀錄。呢一球亦係阿里今屆賽事第9個入球,令佢最終榮膺神射手。


27分鐘,阿斯斯 (Abdulaziz Hatem) 個人突破,帶入中路突施冷箭,世界波彎入,卡塔爾領先到2-0。


69分鐘,日本隊打出靚配合,大迫勇也二傳,南野拓實入楔單刀笠入,追回一球,一度重燃希望。


不過喺83分鐘,球證翻睇VAR,判吉田麻也禁區內犯手球,阿克林阿費夫 (Akram Afif) 操刀射入12碼,為卡塔爾奠定3-1勝局,歷史上首次捧起亞洲盃冠軍!

卡塔爾喺今屆賽事表現驚人,佢哋由分組賽開始直至決賽嘅7場比賽中,去到今場決賽前一直保持零失球,如果唔係被日本精妙配合射入一球,就可以用完美姿態捧盃,佢哋更合共攻入19球,得失球差高達+18,屬歷屆亞洲盃之冠。


儘管卡塔爾正面臨入籍球員資格調查,而涉事球員正係神射手艾莫爾茲阿里,不過相信要推翻整個大型賽事嘅賽果難度極高,發起投訴嘅阿聯酋足協需要提出極具說服力嘅證據先可以成事,一旦賽果被推翻,將會成為近代足球一大醜聞。

AFC官方全場精華

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→