亞洲盃神射手被指為違規入籍兵,卡塔爾最嚴重可被取消資格

睇足365 於 01/02/2019 發表 收藏文章
亞洲盃決賽將會於香港時間今日 (2月1日) 晚上10點開戰,由日本面對卡塔爾,不過卡塔爾喺賽前迎嚟不利消息,亞洲足協發言人表示收到阿聯酋抗議,指卡塔爾派出兩名違規入籍球員上陣,將會進行調查。根據亞洲足協規定,一旦查明屬實,違規球隊有可能被取消參賽資格、罰款及禁止參加未來賽事。


卡塔爾喺亞洲盃四強以4-0擊敗阿聯酋,阿聯酋球迷喺比賽中向草地投擲雜物引起爭議,但問題唔止咁少,阿聯酋賽後向亞洲足協投訴,指卡塔爾派出兩名違規入籍球員喺本屆賽事上陣,據報導指涉事球員係現屆賽事暫列射手榜第一位嘅前鋒艾莫爾茲阿里 (Almoez Ali) ,以及後衛巴撒姆艾拉維 (Bassam Al-Rawi) 。亞洲足協發言人聲明表示已經接到有關投訴,並會展開調查。


根據國際足協有關入籍球員嘅規定,球員入籍必須滿足以下其中一項條件:
1. 球員本人出生於該足協所在地區
2. 父母任意一方出生於該足協所在地區
3. 祖父母任意一方出生於該足協所在地區
4. 18歲後在該足協所在地區連續生活5年以上



前鋒艾莫爾茲阿里於非洲蘇丹出生,現年只有22歲 (1996年8月19日出生),距離18歲生日只有4.5年,即使佢的確喺青年軍時期已經有紀錄喺卡塔爾受訓,都唔可能符合18歲後連續於卡塔爾生活5年以上嘅條件。後衛巴撒姆艾拉維父親 Hisham Ali Al-Rawi 係前伊拉克國腳,佢本人亦喺伊拉克巴格達出生,今年只有21歲,亦唔可能符合18歲後連續於卡塔爾生活5年以上嘅條件。


因此,兩人如要符合入籍資格,只有滿足雙親或祖父母其中一人喺卡塔爾出生嘅條件,事實上兩位球員同樣聲稱母親於卡塔爾出生。卡塔爾主帥接受訪問時拒絕評論事件,更令大眾猜測四起。有關報導指,阿聯酋足協聲稱擁有確切文件證據,可以證明巴撒姆艾拉維母親亦於伊拉克巴格達。亞洲足協會要求雙方喺48小時內提交文件證據。卡塔爾近年已招攬多名來自埃及、蘇丹、也門、阿爾及利亞、摩洛哥等地嘅入籍兵。

Source: NYtimesthenational.ae

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→