些路迪蘇超八連冠兼續爭「三連三冠王」 新帥連儂:「多得羅渣士」

睇足365 於 05/05/2019 發表 收藏文章
蘇格蘭超級聯賽周六上演爭標組賽事,些路迪於主場輕鬆擊敗鴨巴甸,提早兩輪宣布奪得聯賽冠軍,完成八連霸偉業,餘下賽事佢哋將會力爭成為三冠王。


蘇超賽制,聯賽第34周開始,12隊蘇超球隊將分成兩組,進入小聯賽賽程,即由聯賽前六位組成嘅「爭標組」,以及由最後六名組成嘅「護級組」,組內進行單循環賽事。

今仗係蘇超第36輪賽事,榜首嘅些路迪作客對第三位嘅鴨巴甸,40分鐘先由右閘路斯迪接應卡林麥基哥傳中頂入插水式頭槌打破僵局。下半場,卡林麥基哥開出角球,祖斯蒙歷同樣以頭槌建功;88分鐘,奧辛尼艾度亞迪快速反擊射成3-0。些路迪先賽,領先未踢今輪比賽嘅格拉斯哥流浪12分,提早鎖定蘇超冠軍。



些路迪已連續八年取得蘇超冠軍,寫下球會史上光輝一頁。不過翻查資料,些路迪歷史上最長蘇超連霸紀錄係由 1965-66 至 1973-74 球季創下嘅九連冠,若些路迪下季再奪冠軍就可以追平呢個紀錄,相信謝拉特率領嘅格拉斯哥流浪下季必定要傾盡全力阻止些路迪喺呢個世代再創歷史。另外,些路迪今季亦已取得蘇格蘭聯賽盃,佢哋將會力爭蘇格蘭盃冠軍,以成為三冠王,咁佢哋就會係球會史上首次連績三年取得三冠王。



尼爾連儂 (Neil Lennon) 今年2月26日,接替轉投李斯特城嘅羅渣士,再度成為些路迪主帥,佢喺賽後就感謝球迷、球員嘅支持及努力,又表示今次奪冠要歸功於前任領隊羅渣士打下基礎。



比賽精華

Source: SkySportsNowSports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→