中超韓援金玟哉一句話　中媒洗版式狙擊新浪一日30篇報導

喺中國搵食就最怕得罪玻璃心，只要你講錯一句說話，就會被提升到民族、政治層面，繼以被封殺。如果唔係喺中國搵食，雖然呢個情況都會帶嚟好大困擾，但起碼可以當佢哋唱歌；最慘係你真係賺緊人民幣，中國人一句大條道理，話你賺中國錢仲批評中國，你就冇運行，有時候一個外國人真係想像唔到隨後講兩句個人感受，都會被講成批評中國……


今次又有人唔小心得罪玻璃心，「傷害14億人民感情」，喺網上被群起而攻，講緊嘅係北京國安中堅金玟哉。現年23歲嘅金玟哉，係韓國國腳，喺2019年1月由全北現代汽車轉投中超球隊北京國安。最近佢喺韓國一個節目中談及喺中國踢波嘅點滴，其中提到自己喺北京國安嘅防線拍檔雖然都係中國國腳，但防守意識不足，令佢感到自己「工作量」大增：「我並不是無視中國球員。畢竟我還在場上。有時候，我要當兩個人用。後防球員全都是前鋒出身，所以從後衛層面分析的話，對於防守的理解會有些欠缺，雖然他們是國家隊的球員，但防守意識還是差了點。他們不是國家隊的主力，但主力上了也不行啊。」(引述中國傳媒翻譯) 佢又指，身為外援喺中超踢波特別辛苦：「外援有時候踢累了，也會搖頭，但中國球員可能不太理解那種心情。」

金玟哉喺北京國安嘅中國國腳級後衛隊友有李磊、于大寶及王剛，其中于大寶正正係由前鋒轉踢中堅。金玟哉嘅說話好快被翻譯成不同版本喺網上流傳，其中有人加鹽加醋，認為佢輕視中國球員及批評中國足球水平。事實上，即使喺中國網上群情洶湧，仍有不少球迷試圖為佢解釋，認為當中涉及翻譯問題，以及節目效果，因為金玟哉一向以「開心果」形象示人，可能只係口直心快，加上綜藝節目效果及剪接問題，引致被錯誤解讀，其中佢亦曾經談及喺韓職球隊全北現代汽車，當時隊友左閘金珍洙就經常唔回防：「兩閘不回防，我會很累，畢竟我一個人要補位，所以我叫珍洙回來，但珍洙就說我一個人守得住的。這個時候，我會覺得開心，因為感覺被信任。在中國也是一樣，他們也說你沒有問題的，全上了去不回防。40度下比賽，真的不回防的，防線就只餘兩個人，太艱難了！」可見佢並非針對中國，主持人又笑問「寫好辭職信了嗎？」，金玟哉笑住回答「哈哈幫我剪一下」。

有中國網民就直言認為佢講得啱，中國足球水平的確唔夠 (網民：「說實話也不行？」、「這是事實」)，但仍然有唔少網民認為國家受到侮辱，不可容忍。中國各大傳媒洗版式報導，單係新浪體育24小時內已經超過30篇相關報導！ (如：新浪《鐵證！看不起中國足球：金玟哉去年就曾2次公開抱怨隊友！》、《國安韓國籍外援暗諷隊友：踢球水平不行，有機會一定去歐洲發展！》、憧球帝某專欄《「無所畏」還是「情商低」，金玟哉都該明白薪水是誰在買單》)。自稱媒體人（廣州） 足球報資深責編、新媒體事業部內容總監嘅盧基琳更稱：「金玟哉這個事情沒得洗，你對中國足球有偏見或者骨子裡看不起都沒關係，這是中國足球自己不爭氣。但你在外面這麼公然說，那就是你的問題了，還記不住主教練的名字，我如果是那個改打後衛的前鋒，我把你腿打斷。 #國安韓國外援吐槽中國隊友# ​​​​」，中國U16隊長何小珂更表示：「甚麼玩意兒，早點打包走人，去歐洲協防去吧，胖的跟豬似的......」

結果，金玟哉事後知道闖禍，先向球會及隊友作口頭道歉，再向球會呈交書面道歉，願意接受球會懲處。北京國安回覆稱讚金玟哉事後處理態度良好，但由於佢首先違反內部規定，擅自接受傳媒訪問而未有問准球會，加上訪問內容帶來負面影響，仍然需要按例嚴加處罰。
話雖如此，如果客觀去睇成件事，任何一個球員公開批評自己隊友，放喺世上其他地方，一樣會被視為一個負面行為，試想像一位英超球員喺鏡頭前面話自己隊友不濟，一樣可能被球會處分，甚至被教練認為破壞團體精神而棄用及賣走，所以如果對金玟哉嘅批評只係關於一名職業球員唔應該公開批評自己隊友，其實係冇問題，只不過金玟哉嘅言論最多都係批評咗北京國安入面嘅球員，但就被解讀為批評中超水平，甚至貶低中國，實在係小事化大，呢個傳媒洗版式狙擊情度亦相當驚人。以中國球壇整體氛圍及金玟哉大情大性嘅性格，估計佢留喺中超嘅日子都唔長。