【中堅賓】卓普莫亭離門1CM失機,被翻炒成Miss Of The Decade

睇足365 於 01/01/2020 發表 收藏文章
冇睇開法甲嘅朋友,或者唔記得有一位前史篤城前鋒喺2018年「一登龍門」,加盟法甲班霸巴黎聖日耳門,佢就係卓普莫亭 (Eric Maxim Choupo-Moting) 。卓普莫亭效力史篤城時係2017-18球季,當季史篤城降班收場,而且卓普莫亭於聯賽上陣30場 (26場正選) 錄得5入球5助攻,換句話講,PSG簽入一位英超降班球隊球員,佢嘅表現都唔係特別出色。咁樣已經夠離奇?一定未夠佢今年嘅世紀失機離奇。


喺2019年4月,一如以往預計可以輕鬆封王嘅PSG,於聯賽派出副選,但佢哋都唔係冇任務在身,佢哋要爭取提早封王。法甲第31輪賽事,PSG主場迎戰「升班馬」斯特拉斯堡,PSG只要贏波就可以提前8輪奪冠,卓普莫亭喺13分鐘就先開紀錄,準備做功臣?未有咁早!


斯特拉斯堡喺26分鐘就扳平1-1,之後輪到PSG再有入球機會,尼干古接應直線,窄位引得對手門將出迎,輕輕一挑,個波飛向龍門口,呢個時候趕到門前嘅卓普莫亭,「射手觸覺」出晒嚟。雖然事後睇返,佢唔掂個波都一樣會入,但球員去到門前都唔諗得咁多,大部分都會加一腳確保個波入網。點知佢面對空門只有半步之遙,竟然用左腳將個波碰向反方向,變相解圍護空門。最搞笑嘅係觸發咗鷹眼系統去展示呢個波入定唔入,卓普莫亭觸球之隙,佢隻腳同個波已經喺白界線上,咁都「救」返個波出嚟,真係神奇過「中堅賓」。

(前阿仙奴前鋒賓特拿曾經路過擋出隊友射門,獲得「中堅賓」稱號)

結果,PSG呢場波以2-2收場,卓普莫亭既取得一個入球,又阻止球隊取得另一個入球,真係「神又係你,鬼又係你」,而PSG因為咁錯失於該輪奪冠,當然佢哋最終都係無人能阻。


Source: Sportbible

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→