不知幾穩定!梅斯達菲單場兩派膠,史浩克04慘吞五蛋

睇足365 於 14/03/2021 發表 收藏文章
作為後防球員,不求球王上身,但求夠穩定。前德國國腳梅斯達菲以前其實都唔係衰到貼地,衰在表現時好時壞,差起上嚟炸彈上身,累球隊輸波,但起碼有好過,佢表現集中起上嚟其實唔失禮,就係衰在表現唔穩定,犯咗後防球員嘅大忌。近日轉投德甲史浩克04,梅斯達菲重新出發,表現穩咗好多,不過就係穩定地累事,輸到貼地嘅史浩克04都唔知係唔係所托非人喇……


喺今輪德甲比賽,禾夫斯堡主場對史浩克04,「礦工」深陷護級漩渦,「行路打倒褪」,本身好地地,踢到31分鐘,禾夫斯堡傳中斬入禁區,梅斯達菲解圍不遠,個波落喺禁區頂,對手再次傳入禁區時,個波俾隊友閘到彈高咗,梅斯達菲跳起用頭輕輕一點,唔知係唔係想玩高章波點俾門將接,定係諗住頂出底線解圍,總之結果就真係相當「高章」,彈地死角入網,令史浩克04先失一球。

單係呢球已經令網上「瘋狂」,外國網民喺Twitter洗版式「大讚」梅斯達菲「頂得靚」,有外國阿仙奴球迷表示「今次終於唔係我哋受害喇!」。

loading
loading


呢一個失波簡直係為禾夫斯堡打開缺口,狼堡下半場連入四球,其中去到58分鐘,史浩克04喺後場組織,個波落喺梅斯達菲腳下,當下禾夫斯堡前線球員逼到埋身,梅斯達菲冇選擇再向後交俾門將,而係打算大步向前推過對手殺出重圍,結果俾對手偷到,兩腳傳波射入,輸到去3:0。賽後,統計網站Squawka稱,梅斯達菲今場一個烏龍球,再加一個失誤導致失球,可以同場發生,係近5季德甲僅有6人之一。

loading
loading


最終,史浩克04作客以0:5慘敗,得失球差已經去到驚人嘅-50!賽後繼續排包尾,25戰只得10分,就算想踢附加賽都仲要追11分(即係仲多過佢哋呢大半季拎嘅分數!),所以護級恐怕要有奇蹟出現先得。不過講係咁講,一隊波差到咁嘅地步,已經唔係一個半個球員嘅責任,事實上梅斯達菲喺季中加盟之前,史浩克已經係衰到貼地,有時候當一隊波整體都有問題嘅時候,擺邊個落去可能都係無補於事,希望佢哋收拾心情重新振作啦!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→