【一月復出?】卡蘇拿八次手術險需截肢,醫生:「你可以喺花園散步都偷笑」

睇足365 於 03/11/2017 發表 收藏文章
如果唔係阿仙奴球迷,可能已經忘記咗辛迪卡蘇拿呢位球員。人稱「卡叔」嘅卡蘇拿,深受阿仙奴球迷愛戴,好多球迷都覺得如果佢能夠出場,阿仙奴嘅成績應該唔會搞成咁喎。阿仙奴總係離唔開傷患,越係好波嘅球員越易傷,而卡叔上一次喺正式比賽中為阿仙奴上陣,已經係2016年10月,原來佢仲差啲以後都踢唔到波。

西班牙中場卡蘇拿「人仔細細」,初初嚟到阿仙奴時,有球迷懷疑佢「嬌小」嘅身型能唔能夠適應碰撞激烈嘅英超,但佢好快就用表現征服咗一眾廠迷,甚至喺可以喺競爭激烈嘅西班牙國家隊中場佔一席位,更估唔到嘅係,奧斯爾加盟之後,卡蘇拿移後打墮後中場,適應一排之後仍然有好表現,派牌依然有功架、防守遮線都做到足,以佢同大衛施華差唔多嘅身型嚟講,真係十分難得。


喺2016年10月尾嘅歐聯分組賽中,卡蘇拿同高基連拍檔上陣,喺56分鐘以一個絕妙長傳,助攻奧斯爾單刀射入,但佢喺57分鐘就退下火線。賽後,雲加表示卡蘇拿有少少傷,點知呢少少傷就傷足一年,甚至危及卡叔嘅職業生涯。


之後嘅檢查,證實卡叔腳踭嘅阿基理斯腱受傷,需要進行手術。結果,因為傷勢反覆,卡叔直至最近已經完成咗8次手術!

loading


最近刊出嘅《馬卡報》,登出咗一張十分震撼嘅相片,就係卡叔經歷過8次手術嘅腳踭。卡叔喺呢個訪問中透露,醫生喺佢當初接受治療之後,患處無法癒合,發現佢喺開刀後受細菌感染,呢次感染有可能威脅到佢嘅生命,所以一度考慮要幫佢截肢保命,而且曾經同佢講,佢可以喺後花園同仔仔散步已經好好彩。

卡叔話佢嘅右腳阿基理斯腱喺多次手術中少咗8厘米,更加因為多次開刀,腳踭已經唔夠皮膚,須要移植皮膚,而最終就用咗佢手上紋上咗女女個名嘅部份。

loading


不過,大家唔需要太擔心,因為佢講緊嘅嘢已經過咗去,卡叔早排已經喺Instagram上傳咗自己康復訓練嘅相,雖然應該冇得踢波住,但至少睇落行得,仲可以做GYM,希望佢早日康復啦!

loading

loading
loading

loading


佢都感謝阿仙奴對佢嘅支持,佢喺5月接受訪問時話:「阿仙奴對我好好,佢哋喺我做手術之前同我續約,領隊都有同我傾計,令我放心。」

另外,雲加最近回答記者,話卡蘇拿有可能喺2018年1月復出:「初步睇落係正面嘅,不過佢有成一年幾冇踢過波。佢仲未可以參加完整訓練,佢亦將會需要踢幾場預備組比賽先。如果一切順利的話,將會係聖誕之後嘅事。」點都好,最緊要唔好勉強!

Source: Daily MailTelegraphMirror

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • OhMyGirl_Arin
    OhMyGirl_Arin 於 04/11/2017 評論 NO. 1

    本身得167 無左8cm咪得返159

快捷鍵:←
快捷鍵:→