一圖表睇清每季效率 賓施馬:「以前要為C朗服務,而家我係鋒線大佬,可以做返自己!」

睇足365 於 27/02/2019 發表 收藏文章
皇家馬德里前鋒賓施馬一直係爭議人物,向來都有好多球迷認為佢入球能力不足,冇資格做皇馬正選前鋒,不過賓施馬過去多年嚟一直穩佔皇馬正箭頭之位,亦反映佢或者有啲過人之處吸引到主帥重用。的確,除去狀態起伏不計,賓施馬有可能係世上最強策應型中鋒之一,即使唔係所有人同意呢點,佢亦最起碼有資格被納入呢個討論之中,咁已經間接反映佢有一定級數。賓施馬最近接受訪問時,提到自己喺皇馬陣中嘅角色,唔知有冇幫助球迷去理解佢嘅處境,甚至為佢平反呢?


今年31歲嘅賓施馬,當年喺2009年同C朗拿度同期加盟皇馬,直至C朗喺今季加盟祖雲達斯前,兩人一直合作無間,但眾所周知皇馬必定以C朗核心組建球隊,賓施馬嘅角色亦要遷就C朗。賓施馬最近接受《法國足球》專訪,認為自己今季先可以踢返自己嘅足球風格:

「之前,我哋有一位一季射入50球以上嘅球員在陣,我就負責做輸送嘅工作。雖然我著住9號球衣,但我唔係真正意義上嘅正箭頭。我過去都係為基斯坦奴 (Christiano) 服務,我哋成為一對好強嘅攻擊二人組。我喺場上總係搵佢嘅位置,目標係協助佢射入更多入球,扮演著一個輔助嘅角色。

而家輪到我去展現自己嘅入球慾望,我希望帶領球隊取勝,呢個先係我想做嘅事,亦係我以前喺里昂所做嘅事。我同自己講,我要將呢個心態帶嚟皇馬,甚至要變得更強,我而家做到喇。」


已經步過而立之年,賓施馬狀態不及當年係可以預期,佢近兩季嘅入球效率的而且確有所下滑。不過,今季尚未完成,佢嘅入球數字已經超越過去兩個球季。今季賓施馬各項賽事上陣40場,已射入20球,過去2017-18及2016-17球季,佢全季只分別射入12及19球。

講到「一圖睇清」就要講返效率方面:


賓施馬今季暫時平均每90分鐘射入0.57球,比2017-18球季有明顯提升,比2016-17球季就卻只高出少許,但如果佢喺今季餘下賽事保持或稍稍提高效率,就足以成為佢除2015-16球季之外,近6個球季入球效率最高嘅一季。考慮到佢已經31歲,咁已經可以視為某程度上嘅進步。數字上嘅改變就展示咗出嚟喇,但球迷又覺得賓施馬今季喺場面上嘅表現同作用如何呢?

Source: ESPN

留言


請按此登錄後留言。未成為會員? 立即註冊
    快捷鍵:←
    快捷鍵:→