消失的進攻套路

細個由識睇波開始,一直都喜歡鑽研陣法。有幸當上FBFC (巴塞球迷足球隊) 的領隊,更幸運地每個位置都擁有兩個好球員以上,如何好好善用每一位球員,確實是幸福而傷腦筋的煩惱,但的確係一個好好的實踐機會。世上無如果,不過吹水就有。就借呢個地盤等我FF一下,如果比我當上巴塞的領隊,我會如何激活整隊球隊 (篇幅有限,集中先談進攻)。

先研究核心問題,新陣式新戰術應該圍繞美斯而設計嗎?答案是肯定的。巴迷一定睇到上季美斯其實一個人做了大部份中前場的進攻角色,策劃係佢甚至終結都係靠佢。如何設計?先從佢呢兩年轉左型之後嘅特性開始諗,隨著沙維和艾維斯的離開,中路和右路基本上都係佢地頭,大部份時間佢都係喺邊線攞波,然後推入中路再作選擇。選擇一般有 1)放斜線比尼馬;2)交比禁區頂的尼馬或蘇做 one two;3) 自己去;4)如所有路線被封則橫傳或後傳。掉轉諗如果你係對手你會點防?在禁區頂放三個中路守將防止2同3,右閘加右中場專注防尼馬同或艾巴的入楔,1便很難生效。

相信1234這些畫面大家都很熟悉吧。問題來了,右路呢?右路為我們提供了什麼?我無數字,甚至連印象也沒有!拉傑迪和羅白即使在右路攞到波,回傳的比例佔很多。基本上可以說丹尼爾走後我們的右路癱了 (未能做出有威脅的攻勢)。平行時空嘅另一邊係尼馬在左路推推推扭扭扭,然後推入中間或推深少少,最後尋找入楔的美斯然後嘗試交比佢。唔知幾時開始艾巴變左佢嘅盲點,尼馬基本上睇佢唔到。即係咩呢?我們的左路一樣癱了。對上一次我仲記得艾巴助攻比尼馬入波,已經係15年歐聯決賽對祖雲艾巴斬比尼馬頂入,可惜頂中手。

回憶總是溫柔的。哥帥的年代最恐怖的地方是無孔不入,控傳只是手段、過程。控傳最終的目的是找孔而入,無論是HEM還是MVP,巴塞的攻勢都是多方位多元化和多變性的,例如當一邊小白和艾比度柏度在三角短傳,當敵方忙於在馬騮搶波的時候,另一邊艾維斯俏俏地殺上,跟著左邊一個過頭大斜線放給丹尼爾,丹尼爾第一時間撞出中間,GOALLLLL。就係咁簡單,同樣進攻右路的沙維 / 美斯或丹尼爾一樣會放比左邊殺上的艾比度,製造同樣的效果。這些畫面相信巴迷仍然記得,不過都只在回憶中了。其實真係咁簡單?這些由小三角組織進展至大三角的射門,需要一定的默契,節奏的調度和準確的時機,這些套路都一定練習過無數次。

要激活巴塞,首先要令巴塞回復進攻套路的多元化。其中一個方法為4312,名正言順把美斯放在尼馬和蘇的身後,索性轉型成一個中前場的自由人。而尼馬和蘇在前線的走位應該更多變,先可以令人防不勝防,特別係尼馬其實都接近雙槍,只在邊路活動有點浪費,把他移近中間及移近美斯一定有更大威脅。由於SN變為近似雙中鋒,我們需要得到兩邊強大的支援。由於執筆時聽到很多轉會傳聞但未有一單證實,所以呢刻唯有只談戰術只談現有人選。最好的人其實一直都在,無論比拿連最後回不回家,我們都有維度,釋放維度和艾巴,讓他們重回飛翼的角色吧。
不過4312的問題在於,大家都知MSN裡面會回防的只有N,這個陣式只有令尼馬更遠離防守,所以我更傾向4231。阿蘇最前,尼馬左邊,美斯在阿蘇的身後,而右邊就要補入一位殺手。古天奴、夏薩特、傳聞中拜仁的哥斯達、甚至離家的柏度或哈利奴域都是好的選擇。中場偏後的2,除了鐵膽巴斯基斯,另一個選擇一係工兵型,一係大膽地多一個創造型,與美斯組成雙核,我更傾向後者。列卡特時代都曾經出現過三位創造型中場同時上陣,沙維小白加迪高。反正巴塞其中一個哲學就是進攻,就讓進攻來減輕防守的壓力吧。買人補強固然重要,但尋回消失的進攻套路才是重中之重 (其實我幾唔得呢個term)。

By 簡帥@FBFC

如果喜歡我們的文章,請即分享到︰

留言


請按此登錄後留言。未成為會員? 立即註冊
  • Paul Tsang23 於 08/06/2017 評論 NO. 1

    弱智 又飛翼 又三核 又前鋒又攻中 又殺手 防守0人? 好呀 都時巴菜就真係一棵菜 任人砌

  • Estyip 於 09/06/2017 評論 NO. 2

    講真依家中場傳送穿透力不足好致命。

  • Estyip 於 09/06/2017 評論 NO. 3

    而且小白轉打法之後始終及唔上沙維(自己上網查數據),中場要搵返過好似以前小白咁既類型先可以激活依家既小白,而唔係回傳王

  • vm 於 10/06/2017 評論 NO. 4

    ……抽水嘅人都唔少

快捷鍵:←
快捷鍵:→