華維迪﹕卡斯美路就係我爸爸

自古以來都有人會認別人做爸爸，古有Luke和黑武士被認爸爸，假巴斯光年與索克天王（一樣啦），今有中大生認段爸，費特列高華維迪認卡斯美路做爸爸。
現年二十一歲的華維迪在二零一六年從烏拉圭球隊Peñarol加入皇馬B隊，一七年外借至拉科魯尼亞，一八年提拔至一隊。蘇拿利還在任教B隊教頭時，曾盛讚華維迪適應力高，能在中場發動很多攻勢。
華維迪今季異軍突起，取代摩迪的正選位置。他在卡斯美路的前面已經開始掃蕩，進攻速度高，跑動多致釋放了卻奧斯的統治能力。恰巧摩迪和卻奧斯同場便賽和了貝迪斯，更顯得華維迪重要（如果高華錫今年回巢，正選位置非他莫屬）。場上勇猛的華維迪，場外卻十分安靜。
華維迪近日向Real Madrid TV表示：「我怕醜仔黎架，我會尊重人地嘅空間，但係我又想成個場都跑哂喎。」
「我都知緊張就成日都會有架啦，你出得場就要付出哂全部。打吡對馬體會之前，我知要踢正選，緊張到我呢！」

「卡斯美路過黎問我：『驚呀？』我話：『無呀，行咯。』其實佢見到我手都震哂。」
華維迪指出在眾多隊友之中，卡斯美路對他的成長幫助很多。

「我喺佢地身上學到好多野，每個人背後有自己嘅故事。」

「卡斯美路特別照顧我，俾意見我同聽我講發生咩事。」

「我地都係南美人，佢點都企我嗰邊，我好多謝佢。」

華維迪經常與卡斯美路一起，並透露了一些在訓練場上的事。
「到咗訓練場，同隊友食個早餐，同佢地吹水，成日同卡斯美路亂噏野，我講錯野佢成日幫我改，佢真係似我老豆。」

「之後就盡全力去訓練，總係有啲球員好突出，卻奧斯永遠都唔會甩腳嘅。我好享受同佢地一齊訓練，好正好好玩。」
除了卡斯美路，施丹亦幫了華維迪很多。
「老細讚你實開心嘅。」

「佢同卡斯美路好似，幫我逼啲潛能出黎，叫我唔好怕醜。」

自從上年上了一隊，華維迪開了站穩腳步。

「我為咗我屋企人，為咗我女朋友而戰鬥，佢地幫左我好多。」

「我想多謝佢地幫我做左咁多，宜家係時候再進一步。」

「我覺得我二十一歲就踢到一間咁大嘅球會真係好不可思議，我會好好享受同埋充分利用喺皇馬嘅時間，話比人知我係一個點樣嘅球員。」

「我會繼續努力，為球隊達成目標。」