英超25年最佳11人 雙特、咸爺、舒利亞無份

Extra-time 於 18/10/2016 發表 收藏文章

英超邁向25周年銀禧紀念,回顧歷年出現的經典球星,真是數到天黑都數不完。要把顆顆閃耀的繁星,擠進只得十一個席位的英超史上「最佳陣容」,絕非優差易事,不如輕鬆食住花生,睇吓英國球迷點樣選擇,然後一齊大大聲噓佢哋 : 九両菜啊!有阿乜水,但無阿邊個!

準備,嚟啦.....

門將 : 舒米高
呢個位置真係無爭議之至。事實上,舒米高獲得了過半數的55%支持,抛離得18%選票的施治,而並列第三的施文和雲達沙,只得8%。睇吓再過廿五年,會唔會仲係舒米高,甚至是有個K字頭嘅舒米高。

右後衛 : 加利尼維利
加利佬雖然被本港某球評家力數「三大缺點」,但其表現深受自己國民認同,以63%高票當選,仲勁過丹麥鋼門。此位置上的人選相對唔強,但後備席位爭持激烈,前阿仙奴球員羅倫美亞及迪臣分別得到9%及8%選票,現役車仔的伊雲奴域亦有8%。

中堅 : 泰利
又係眾望所歸,泰利+里奧呢對組合,英格蘭國家隊都用咗好多年,的確好有級數,反觀而家嘅英軍就.....
泰利同里奧得票率叮噹馬頭,車路士隊長贏個馬鼻,以22%稍勝里奧的21%。

中堅 : 里奧費迪南
位列泰利和里奧之後的,有現任重慶力帆體育總監的前阿仙奴隊長阿當斯,以及前曼聯隊長維迪,兩人分別獲票18%及13%,講真此四人都可謂一時之選,後輩難以相比。
左後衛 : 艾殊利高爾
左閘的選戰較為緊湊,前槍手及藍戰士A高,大戰艾夫拿和艾雲兩名前紅魔,結果「雙艾」分別得票26%及22%,A高41%完勝。佢而家仲係現役球員,唔係羅馬,去咗美職啦!

中場 : 史高斯
中場中好多強勁人才可供選擇,史高斯能以30%得票突圍而出,已屬難能可貴。巔峯時期嘅史高斯,中距離硬射同傳送都係一絕,不過個人就認為佢師兄堅尼更全能、更硬淨、更有領導才能。

中場 : 韋拉
擅長準確攔截和轉守為攻的韋拉得到18%選票,取得另一中路席位。謝拉特和林柏特分別只獲13%和11%得票,其實「雙特」雖在英軍同場唔多work,但無話唔可以一齊入選英超最佳陣容架噃!

右翼 : C朗
有C朗,唔駛多講,得票44%,連萬人迷碧咸都輸半條街,只能以36%屈居第二。魚與熊掌,又唔同類型,真係幾難取捨。曼聯球迷呢個時候應該會話 : 梗係擺C朗上前線,留咸爺係中場打正選,咪得囉!
左翼 : 傑斯
傑斯是本陣容的票王,有67%得票,唔擺佢落場點得?一億歐元身價的威記師弟巴爾低見8%,與阿仙奴的皮里斯並列第二。其他人選有真路拿、班尼斯、奧華馬斯、大衛施華、夏薩特等,強!

前鋒 : 亨利
箭頭位置當然人才濟濟,亨利獲得超過三分一的支持率(34%),入選應該毫無爭議,但與他拍檔的前鋒人選就爭崩頭了,看得出連英國球迷也有好大分歧.....

前鋒 : 杜奧巴
巴哥是十一人中得票最低者,僅以14%險勝得13%的簡東拿,本土出產的英籍神鋒舒利亞竟然爆冷只得12%。只能嘆句,投票嘅嘢.....如果當年曼聯爭人爭贏扭卡數,這個結果必會改寫。
最後要一提,以上結果是由英國太陽報主辦的讀者投票選出,該報與利物浦球迷積怨甚深,因此相信讀者群中較少紅軍球迷,投選結果似乎亦反映出此一現象。隨著英超25年愈來愈近,類似的陣容評選相信陸續有來,球迷如不滿意以上選舉結果,可留意日後其他機構評選之最佳陣容,投下神聖一票。

舒米高
加利尼維利 - 泰利 - 里奧費迪南 - 艾殊利高爾
C朗 - 史高斯 - 韋拉 - 傑斯
杜奧巴 - 亨利


Ref:sun

英超十大射手 英人十佔其九 一中場入前四

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→