歐聯D組詳細分析

歐洲足球吹水台 於 10/09/2013 發表 收藏文章
歐聯小組分組賽抽籤已經早係兩個星期前出左爐, 抱歉本人未能即時為球迷分析及預測每組既形勢! 所以由今日開始本人將會繼續為大家分析一下小組D至到小組H既歐聯比賽。

D組小組球隊名單如下:

拜仁慕尼黑(德國)

曼城(英國)

莫斯科中央陸軍(俄羅斯)

比爾森勝利 (捷克)


上屆歐聯得主拜仁慕尼黑響今年小組賽形勢可圈可點, 客場面對曼城同莫斯科中央陸軍需要打醒十二分精神。多得軒加斯既帶領下拜仁成為上年歐洲三冠王,而今季接替軒加斯教鞭既哥迪奧拿可以話壓力不少! 哥迪帥響8月尾既歐洲超級盃賽事以12碼擊敗歐霸冠軍車路士贏得拜仁第一個獎盃,成績有目共睹。但係由於哥帥執教拜仁既時間比較短, 要係德甲同歐洲賽問鼎冠軍有相當既難度...所以相信拜仁今年未必能夠蟬聯歐聯冠軍, 預計可能4強止步。但毫無疑問, 拜仁呢支德甲勁旅好大機會係D組鎖定小組第一名出線。 鑒於比爾森勝利既實力有限, 次名出線將會由曼城同莫斯科中央陸軍爭奪! 談到拜仁既新面孔除左哥迪奧拿之外, 當然唔少得今年新加盟既球員, 其中前多蒙特超級新星馬利奧葛斯同巴塞隆隆拿天才中場堤亞高艾簡達拿值得球迷留意一下佢地兩個係拜仁既表現! 而其他球員例如岩岩拎左歐洲足協最佳球員既列貝利同洛賓將會繼續雙翼齊飛! 今年拜仁亦有放走兩個值得注意既球員, 分別係古斯達禾同高美斯, 哥帥好明顯要改造球隊, 要係德甲大玩Titikaka。



曼城, 近幾年火速冒起既一隊豪門球隊, 係歐洲賽事未能大放異彩...前教練文仙尼普遍被認為唔識打歐戰既一位教練, 的確...曼城近幾年都未試過小組出線。但係, 自從經驗老到既柏歷連尼擔任曼城主帥之後,相信曼城將會係未來2-3年係歐洲賽事會打出好成績! 點解? 柏歷連尼既歐戰經驗比文仙尼多而且前者曾經帶領維拉利爾同馬拉加響歐聯賽事令球迷留下非常深刻既印象! 快將60歲既柏歷連尼智利出身,執教過智利, 阿根廷, 西班牙及英超球隊。2004年, 柏歷連尼從阿根廷球會河床被邀請到西班牙維拉利爾球隊執教, 執教第一年就帶領黃色潛水艇勇奪西甲季軍, 其後第二年維拉利爾係歐洲聯盟杯晉級到八強, 到 2006年球隊更打入歐聯四強, 可惜不敵英超既阿仙奴。2009年柏帥被委任為皇家馬德里既主帥, 同時球隊購入卡卡及C朗兩名巨星級球員, 但柏歷連尼響2009-10賽季未能做出滿意既成績, 當年巴塞既強勢皇馬只係3分之差錯失西甲冠軍, 而歐聯成績亦不太理想, 16強被法甲既里昂擊敗,最終呢位智利教頭未過一年就被皇馬中止左合約。失意既佢響2010年獲得馬拉加既邀請成為球隊教練, 更係2011-12年西甲賽季奪得西甲第四名, 其後2012-13 歐聯賽事柏歷連尼歷史性首次帶領馬拉加打入八強, 可惜對手多蒙特臨完場前閃電般連入兩球令球隊無緣四強。

今後曼城靠你啦!


柏歷連尼執教過唔同國家既球隊,雖然佢無為任何球隊取得過主要賽事既獎盃或者冠軍, 但柏歷連尼係激活球隊方面做得相當之好。如今佢成為曼城主帥, 球隊人強馬壯, 相信曼城有柏歷連尼領導下一定會係英超同歐聯賽事取得驕人既成績。未來2-3年歐聯比賽曼城有能力殺入八強, 甚至四強! 因為曼城對上兩年歐聯小組賽均未能出線既關係, 曼城取得次名出線乃最大目標。無論響主場客場方面曼城需要提防拜仁慕尼黑既雙殺, 同埋唔可以忽視中央陸軍既實力, 當然, 曼城如果能夠雙殺比爾森勝利同埋莫斯科中央陸軍, 次名出線可以話坐定粒六。

上赛季既俄超冠軍莫斯科中央陸軍隊內有唔少俄羅斯國腳坐陣, 而且慶幸既係球隊核心本田圭佑無被賣走(若成事應該係去AC)。近幾年, 中央陸軍響歐戰成績普普通通, 最佳成績係於09/10年打入8強,11/12賽季打入16強, 面對拜仁慕尼黑同曼城兩支勁旅, 中央陸軍次名出線都危危乎, 但並唔代表無希望, 如果能夠雙殺比爾森勝利同埋爆冷贏到一場曼城或拜仁的話, 次名出線希望依然存在! 所以CSKA你地好好努力吧...\

最後都講一講比爾森勝利, 近4年球隊主要參與歐霸盃賽事, 最近一次參與歐聯比賽係11/12賽季上組賽但未能出線, 當時位於小組H既比爾森勝利同組有AC米蘭同巴塞隆拿, 今年小組D組同組要面對德甲, 英超同俄超勁旅, 可以話係不幸中之大不幸啦...!

小組D組既看點:

三冠王拜仁小組賽又打曼城, 今次既對決拜仁能唔能夠雙殺曼城?

教練間之對決! 2009年既巴塞同皇馬教頭再次碰頭, 哥迪奧拿VS柏歷連尼 一獨即發!

柏歷連尼可以帶領曼城走幾遠? 為了歐聯, 你可以去到幾盡?

莫斯科中央陸軍會否成績突擊並有能力爭奪次名出線?

比爾森勝利對陣拜仁曼城會否爆冷贏波或者逼和對手?


留意9月17日英國時間19:45分 比爾森勝利VS曼城 同 拜仁慕尼黑VS莫斯科中央陸軍

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→