【世界盃前奏】睇波聽歌系列：《細街盃》——直射遠柱啦喂非洲老死

咁多年黎既世界盃主題曲（香港黎講），冇乜邊首夠《球迷奇遇記》街知巷聞，即使後來既《Victory》同《我著十號》，始終都係冇咁入屋。

其實一直以來，每屆世界盃都keep住有主題曲，例如曾經集大台藝人合唱、但應該冇乜邊個識得唱既《We are the only one》；

以及上屆曾經都有首「充滿東歐民族風」、但幾乎冇喺直播節目裡面聽過既《我們的夢》。

反而非官方既足球歌，可能仲更加令人有印象，其中一首筆者幾喜歡既，係RubberBand既《細街盃》。
2010年非洲首次舉辦世界盃，RubberBand就乘勢推出左呢首《細街盃》，歌詞唔係講睇波睇到三個眼袋既球迷，亦唔係講邊位球員有個地中海，而係街場版既「尋找他鄉的故事」。


足球狂熱將成班非洲人連繫，每個身在香港既非洲勞工，背後都有份流落他鄉打工既辛酸。

最過癮係，MV搵埋千禧年本地波既非洲外援icon卓卓（喀麥隆裔香港球員）助陣，而呢首《細街盃》，都算係近屆世界盃，比較難忘既非官方主題曲喇。

至於今屆世界盃，喀麥隆亦有份踢入決賽周，G組對手係上屆已經同組的包括巴西、瑞士、塞爾維亞，就睇下喀麥隆有無機會出線。