【球壇名帥傳－高美斯】帶過三隊殺入世界盃，曾經的「巴拿馬洪金寶」 精選

2018年世界盃，中北美洲國家巴拿馬首次晉身決賽周，而每當有巴拿馬比賽，就會見到網上一大堆《賭神》陳金城既cap圖，講緊個句「我同巴拿馬總統都算有啲交情」既對白。

作為世界盃新丁既巴拿馬，第二場比賽對住英格蘭，正如賽前所料大敗一場，不過就成功攞到首個世界盃入球，全場巴拿馬球迷開心到震，直頭當贏左波咁款。


37歲老將巴萊為巴拿馬入波，固然成為國家英雄，不過換佢出黎踢既教練高美斯（Hernán Darío Gómez），其實來頭都絕對唔簡單。

呢位無論身形同輪廓，都有幾分似洪金寶既教練，雖然身形肥大，不過又唔覺得佢屬於「霸氣型」，偶爾流露既笑容，更加同佢既身形有種反差。

對英格蘭半場輸緊0:5，換邊後就俾鏡頭影到佢，走去同修夫基唔知講乜；踢完場波大敗1:6，依然笑笑口行埋修夫基度，對佢「直豎拇指」，呢種「大溪地式」既快樂足球，某程度都係世界盃既吸引之處。

講返呢個「巴拿馬洪金寶」既威水史，其實佢係現任唯一一個教頭，先後帶領過三支國家隊，由世界盃外圍賽殺到入決賽周既教練。

除左今次歷史性率領巴拿馬踢世界盃，98、02年佢都分別帶領過哥倫比亞同厄瓜多爾，晉身分組賽階段。

比較可惜既係，連同今次在內，三次帶隊都係分組賽止步。無獨有偶，之前兩次既成績，同樣取得1勝2負。可惜，巴拿馬最終一分都攞唔到，最後一場雖然有入波，但以1:2不敵突尼西亞，三戰皆北。

高美斯亦係世界盃後離開巴拿馬，再度執教厄瓜多爾，最近就返左自己家鄉，執緊哥倫比亞球隊麥德林獨立（Independiente Medellín）。

距離下屆世界盃仲有一年，唔知到時會唔會再見到，呢位曾經的「巴拿馬洪金寶」，破紀錄帶領第四支國家隊晉身決賽周？