史浩克04喺香港比較少人提及，大部分都係多仔同拜仁球迷，什少聽過有朋友係史浩克球迷，甚至連面書都無香港球迷page，真係要數一個史浩克04球迷，可能最出名就係足球評述員劉舜文先生（話說我喺飛機有睇過一個德甲節目裡面有訪問到佢）(劉生你並不孤獨)。
其實史浩克04出產過不少球星 (包括青訓及年輕時轉會)，大部都耳熟能詳，亦有國家隊代表記錄，如果球會能夠keep住呢班球員，今日陣容可能會係：門將 - 紐亞，四人後防 – 泰路．基拿、候偉迪斯、祖爾．馬迪普、高拿仙納，六人中及前場 – 麥斯．美亞、哥列茲卡、奧斯爾、麥堅拿 (尚在史浩克)、戴斯拿及萊利．辛尼。講真，呢個陣容要挑戰聯賽冠軍都唔無可能，只有前鋒位置比較遜色（或者就係因為咁，所以令德國國家隊無優質前鋒用），可惜球會財力同吸引力都無辦法留住呢班球員。
但講得佢哋係造星工廠，佢哋嘅造星步伐並無因為太多有潛質青訓及青年球員流失而停步，前晚德甲戰火重開，見到一個頗為新鮮嘅名子出現喺正選陣容，就係現年22歲嘅亞力山大．紐布 (Alexander Nübel)，最終亦由卡利古尼梅開二道2:1擊敗禾夫斯堡。
- 紐布撲出2017年U21歐國杯冠軍成員謝赫特(Yannick Gerhardt)的單刀波
雖然紐布嘅地標戰喺2015/16年季尾對陣賀芬咸完場前嘅一分鐘入替，但要等到今季先有正選出場機會並能夠踢足90分鐘，而喺上半季已經上陣過5場，聯賽上陣3場有一次clean sheet，歐聯2次對陣加拉搭沙雷都能零封對手，代替短暫受傷嘅正選門將兼隊長費希文，費希文亦曾經讚揚過紐布才華橫溢。歇冬過後，紐布意外地列在正選陣容上，此舉令球隊青訓嘅隊長費希文非常不滿，且看費希文會否成為候偉迪斯後，被領隊泰迪斯高買走嘅隊長喇。
- 隊長費希文
講返紐布，同哥列茲卡一樣並非史浩克04青訓，但到史浩克04才取得德甲上陣經驗。紐布年幼時喺地區球會TSV Tudorf青訓部開始足球生訓練，到2014/15加盟曾經喺德甲曇花一現嘅柏達邦，但沒有喺一隊上陣過，只是喺二隊打滾，一年後就轉會到史浩克04，順帶一提佢嘅合約到2020年6月就會到期。係啱啱嗰場德甲對禾堡，紐布都有媿幾球漂亮撲救，對手六碼左右嘅頭搥攻門和及後的單刀波都一一被紐布化解，究竟紐布有無可能跟隨師兄紐亞成球會及國家隊一號，及至世界頂級門將，又或者會唔會同其他師兄一樣免費轉會呢？咁就要睇吓同紐亞一樣身高193cm嘅紐布今季會有咩發展。
- 紐亞 (2010/11 德國杯冠軍)
請按此登錄後留言。未成為會員? 立即註冊