未算滿意但合格有餘 阿仙奴小勝愛華頓 精選

雖然賽前愛華頓排英超第9名，不過佢哋有幾名主場缺陣，Dewsbury Hall受傷、Ndiaye要出戰非洲杯、老將Gueye停賽，所以阿仙奴喺傷兵逐漸復出下，算係喺人腳上比較完整同有啲優勢。

比賽發展都算順利，先係愛華頓後衛O’Brien禁區內魯莽地手球，十二碼由約基利斯射入係27分鐘先為阿仙奴先開紀錄，並打破自己嘅入球荒。及後比賽都算係喺阿仙奴嘅掌控之中，有賴於愛華頓嘅逼搶侵略性唔夠，四人防線同中埸Garner都係兜後為主，中前埸五人壓迫時，好多時都處於人數劣勢。加上主隊拖肥糖進攻乏力，組織攻勢上做唔到突破同短傳配合，畢竟球員質素有限，更失策係連做最直接嘅攻勢，長傳交波俾前鋒，攻勢都好輕易比阿仙奴瓦解，同埋唔善於喺後場猜傳，所以好快控球權就俾返阿仙奴，令愛華頓都陷入比較被動嘅形勢。

而作客嘅阿仙奴，都貫徹一向作風，採取偏保守嘅控球策略，簡單啲講有唔少時間都見到「U型傳球」嘅格局，縱觀雙方表現同策略，亦係點解愛華頓上半場完全冇射門機會嘅原因。到下半場，雙方都各自有少少調動，但踢法大體上不變，阿仙奴有幾次黃金機會，分別射中柱同比對方封擋到射門，主隊就依然製造唔到具威脅嘅埋門，最後1-0呢個比數維持到完場。呢場波都好好彩，因為球證David Coote執法尺度平等，約基利斯上半場係禁區內被拉倒，無吹判12碼，類似程度嘅碰撞同情況，出現係下半場，愛華頓前鋒Barry被沙列巴踢跌，球證亦無執法不一，同樣認為無需判罰。否則，比賽發展就唔會咁順利啦。

雖然只係小勝，不過值得欣喜嘅係球員表現有起色，以下略略講下部份球員表現：

- 沙列巴防守穩健，有佢守死對方支點（前鋒Barry、Beto），係愛華頓前埸停唔到波，做唔到組織嘅主因之一。
- 拉也表現都好亮眼，成場波都冇撲救機會，但對方不斷長傳斬入禁區，拉也今埸處理高空波好穩陣，冇一次甩手或者驚險嘅場面。佢係後埸組織都有好大貢獻，處理冷靜又合理，更有一次面對對手逼搶下，大膽咁「Cup波」避過。

- 約基利斯算係有起色，隊友都有不斷交波俾佢衝下，起碼製造到壓力比對手後衛，或者轉化成角球，進攻參與度比過去幾埸比賽高。

- 樂於見到沙卡唔只係出現係右路，多咗有意無意咁走到中路，甚至係左路，為自己製造多啲進攻機會之外，對方後防每次防守面對唔同進攻球員，會覺得唔習慣而可能反應慢咗，甚至露出防守破綻。另外，今場沙卡少有地喺英超比賽踢得咁舒服，因為少左一對二情況，同埋愛華頓冇對沙卡做到針對性部署。
- 奧迪加特上下半場踢法都算大改變，上半埸較多墜後接球，有時會將蘇比文迪推前。下半埸奧隊就留喺更前位置，所以多咗交出最後一傳嘅機會。