近況欠佳的槍手 驚險戰勝狼隊賽後評 精選

阿迪達帶領的阿仙奴，一向不善於破解低位防守，今場亦不例外，就算安排艾斯擔任「右8」/進攻中埸，進攻亦不如10月時的阿仙奴流暢。對手狼隊大部份時間都係死守半場，防守陣式為5-3-2，中埸企位平均，阿仙奴很多時候都有人數不足的情況，進攻多數以傳中作結，未能有效轉化成威脅，有零星機會但冇好好把握（特別係馬天利尼），又或者博到角球，但再證明冇咗加比爾，角球攻勢威脅大減。

另外，感覺阿仙奴又要再重新適應，約基利斯在陣時嘅踢法，佢唔會好似美連奴/耶穌/夏域斯，就算壓係前埸進攻，都會回後接應做串連，今埸好多時間都留係禁區附近，留喺一個比較深嘅位置。依家見到嘅問題，前鋒好似夏蘭特咁踢，但阿仙奴製造唔到big chance比個前鋒。下半埸當托沙特、奧迪加特上埸後，開始多左留意約基利斯，同放多啲波俾佢跑。呢幾埸約基利斯狀態麻麻，覺得係時候放佢喺後備一排，再咁踢落去，反而驚佢冇晒信心。
今季另一個經常出現的情況是，球隊於托沙特在埸時，進攻會變得較立體，能夠自己突破、交出致命一傳、墜後做串連，大大減輕「左8」的進攻和組織負擔，今埸上埸就交出斜傳予約基利斯，至少讓後者有更多參與進攻的機會。現時的馬天利尼當然被托沙特比下去，但最近狀態稍為改善，今場他獲得/自己製造了幾個機會，若能把握其中一個，比賽發展已經大為不同。
相信今場比賽，最令人不滿是阿仙奴球員防守積極性。先不論失球前的5分鐘開始，被狼隊控制場面，阿仙奴無法搶回控球，以致死守於後場，但如果只談論失球的過程，對手年輕前鋒Mane前鋒交出長傳入禁區時，沙卡和奧迪加特都沒有給足夠壓力，狼隊高大前鋒Tolu壓住軒卡比下頭鎚頂入。

過去評論都提及過軒卡比未適應英超，特別於高空戰，加上對手身形和身高有明顯優勢，傳球亦較急勁，個人看法不太怪責軒卡比。反而對手在無人看管下交出助攻，首先中前場防守，理應可以更加積極，再者沙卡的防守投入度比過往幾個球季低，尤其是最近兩場比賽。即使球隊進攻變化和銳利度不足，但底線是球隊須抱有應有的防守態度。

另外這場比賽又帶來壞消息，就是賓韋治早在上半埸因傷退下火線，整個球季球隊傷病情況嚴重，就算有深厚的班底，球員狀態很難於受傷後，短時期內重拾狀態，再加上競爭對手曼城和維拉狀態火熱，對爭標形勢真的不敢樂觀。預計阿迪達需要幾個星期調整一下，希望這段期間唔會失去重要分數。