槍手表現未及藍戰士 (上) 精選

想將比賽分成兩段短文，因為上下半場比賽分別太大，以下先講上半埸，兩隊就好似拳擊比賽咁互相駁拳，雖然未分勝負，但車路士明顯係佔優嘅一方。

阿仙奴逼搶失效
上場歐聯對拜仁，提及阿仙奴靠住逼搶佔到優勢。而今場比賽，兩隊球隊都主動出擊，但阿仙奴今次逼搶未能奏效。

首先比賽頭20分鐘，阿迪達係想「先留一手」，兩名中堅會留守，而唔會走上中前埸壓迫，形成兩個中堅守住對手一名前鋒，阿仙奴中場同前鋒六名球員，就要守住車路士後衛同中場，總共七名球員。換言之，對手後場猜傳，即使沒有計上守門員，亦有人數優勢，車路士連番破解阿仙奴前場防守，通常右閘Gusto內切，成為突破點，並且接應傳球後行策應，為進攻球員提供輸送，所以Estevao有好多進攻機會。

20分鐘後，阿迪達作出小改動，要求軒卡比對上Gusto（或回徹的Estevao），填補呢個漏洞，就變成全場人釘人防守，情況係有好轉，起碼車路士冇咁輕鬆運球到前場，但風險係其他後衛，多咗單對單防守，阿仙奴後場會暴露更左空間，防線壓力就會大咗，場面形勢對防守球員嚟講，有更多變化，更加考驗莫斯基拉同軒卡比，特別係防守經驗同臨場反應。

喺呢段時間，車路士仍製造到唔少威脅，當中來自阿仙奴後防嘅失誤、車路士爭贏「第一點」或「第二點」，以及防守反擊。

進攻組織欠流暢
首先要一讚車路士嘅防守表現，三名中場係對抗同壓迫上，阿仙奴好難喺中路發動攻勢，左右閘Gusto同Cucurella單對單防守好穩陣，亦唔會輕易比對方有空間進攻，Neto喺協防都有好大貢獻。
阿仙奴今季組織核心蘇比文迪，大部份時間被Enzo緊貼，持球機會被大大限制。面對對方釘防部署，阿迪達亦有方法，其實縱觀最近幾場比賽，阿仙奴陣式更接近「菱形中場」，或是理解成美連奴墮後，形成四名中場，其一目的是overload對手中埸（4 vs 3），美連奴係中前埸組織參與度頗高，但上半場好多失誤，傳球成功率只得46%，再加上莫斯基拉用球上的不足、蘇比文迪和艾斯被限制、對手成功踢出佢侵略性的防守、近期狀態大勇的托沙特因傷缺陣，都係阿仙奴進攻頻頻斷纜的原因。

莫斯基拉與一線中堅的差距
呢名年輕中堅充滿潛力，但要頂替沙列巴，喺聯賽榜首大戰上陣，今場就睇到佢更多不足，需要更多時間學習同適應英超踢法。

防守上，高空爭頂同對抗性，都被Joao Pedro壓制，好多時俾對手擔住位停球/頂球，令後防好易陷入危機，最危險係比賽第29分鐘，Enzo係莫斯基拉身前爭頂成功，頂向阿仙奴禁區頂附近位置，引黎Joao Pedro與軒卡比爭球，咁啱軒卡比又出現小失誤，形成咗半單刀機會，好彩隊友回防及時，以及對手把握唔到。
另一個比較嚴重嘅失誤，出現係第21分鐘，莫斯基拉目光停留喺回後接球嘅Joao Pedro，而忽略咗Enzo，後者突然起跑入楔，擺脫咗防守並喺禁區頂接波，得到起腳機會，好彩添巴回防保位成功。


另外莫斯基拉，需要用波方面下多點功夫，傳球準繩要再提升，特別係傳入中路嘅line breaking pass，決定要再快點，球隊先更易破解對手第一度防守同展開攻勢。