擁有「人類演算法」之稱 拿玻里首席球探準備加盟阿仙奴

呢幾日各大媒體都報道，喺意大利球壇擁有接近20年足球球探及管理經驗的Maurizio Micheli，同阿仙奴達成協議並準備加入兵工廠。

Maurizio Micheli現時係意大利球會拿玻里擔任Head of Scouting，係佢任下嘅成功收購有好多，亦係近年拿玻里取得穩定成績嘅原因之一。最成功嘅一次，可以講返係2004年，係斯洛伐克將未成名嘅咸錫（Hamsik）帶到去意大利球會布雷西亞，而近年就係格魯吉亞球皇「K先生」，呢位上季帶領巴黎勇奪歐聯嘅主要成員，當時拿玻里只係用1千萬歐元將佢收歸旗下。
知道轉會背後有一個好大嘅團隊去做Scouting、決定同談判，唔係球探可以話哂事，但睇下拿玻里近年嘅收購做參考，有唔少好球員嘅名字，包括現任隊長Di Lorenzo、22-23年意甲MVP Osimhen、翼鋒Politano、拜仁中堅金玟哉、前英超球員McTominay、Gilmour，更唔洗講係今年免簽迪布尼。

至於工作style ，Maurizio Micheli被傳媒形容為「Human Algorithmic 」，因為佢強勁嘅交際能力同人際網絡，佢幾乎認識每一位球員嘅屋企人同另一半，仲會經常同球員、球員經理人、球會總監會面。Maurizio Micheli到現場考察球員，喺疫情之前，試過一年接近用咗200日去周遊列國睇唔同比賽。與此同時佢都好相信數據，於講座入邊都講提及到數據分析同視頻分析喺考察球員當中重要性。
另外傳媒亦指出，佢同球會總監比達有同樣工作特質，做球員分析時候會考慮到球員場上表演外，更會考慮到球員嘅場外生活。而且二人都被譽為擁有出色職業操守，相信以上就係比達請佢返嚟嘅原因。