紙上談兵 --- 阿仙奴第一周比賽點評

紙上談兵工廠 於 13/08/2019 發表 收藏文章
入球球員 & Man of the Match:奧巴美揚

1. 排出4-2-3-1,整體戰術比上年執行得更好,或者韋諾克在中前場嘅走動成為催化劑,球員更了解自己的角色,畢竟上年係剛剛踢熟三後衛陣式時,中途轉陣,球員配置又未必匹配時,就導致出現幾差嘅表現。另外,今場紐卡素未有徹底拉後防線,收縮阿仙奴進攻空間,想睇下阿仙奴今年面對對手「泊大巴打防反」下嘅表現,會唔會比上年有進步到。

2. 先要讚下奧巴美揚,延續熱身賽嘅火熱狀態,除左入波之外,今場拿卡缺席,奧巴美揚努力嘗試做前線傳球目標,不時拉邊現位,令組織更流暢,傳球和場上決定比上季好。

3. 今場勝利嘅主要原因之一,係對手紐卡素表現欠佳,先係因一次傳球失誤,導致失波。而進攻方面,紐卡素長傳及傳中質素未如理想,未能利用及提供足夠供應予前鋒祖連頓Joelinton,減少阿仙奴後防壓力。另外,麥斯明Maximin後備入替,但足以展現個人速度及能力,令馬特蘭尼斯及蒙維爾有數個感到吃力嘅鏡頭。如麥斯明踢足全場,而且紐卡素改善一下長傳同傳中質素,相信呢場比賽的結果很難預料。

4. 沙卡+古安度思係今場中場中嘅正選組合,活力同中路防守力未必足夠,如果沙卡係艾馬尼陣中嘅必然正選,小編心中嘅組合會係沙卡+托里拉,或者沙卡+韋諾克。

5. 正選入面幾位新面孔,張伯斯面對壓力唔大,今場防守表現算唔錯,但相信黎緊幾場先係真正考驗;韋諾克拼勁十足,但表現未有熱身賽般亮眼,下半場失誤甚多,整體表現一般,小編對佢期望幾高,所以有小小失望;尼爾遜係幾位入面最出色果個,可能上季有係一線聯賽(德甲)比賽過,表現好淡定,移入中路做組織同駁腳都做得幾好,邊線同隊友配合無太大問題,再要讚下佢嘅跑動同防守,減輕左蒙維爾嘅壓力。

6. 米希達恩頭15分鐘未入局,及後時間表現唔錯,中路推進同分波方面帶來一定作用。

7. 馬特蘭尼斯今場表現唔錯,但都係受惠於對手表現欠佳,攻強於防嘅佢交左個靚助攻,應該會令球迷對佢有返d好感。

8. 幾位新加盟球員以後備身份上陣,其中比比同施巴路斯狀態平平,又或者需要多d時間熱身。比比帶波時腳步幾密,有助面對對手變速突破;另外比比有一定觀察對手企位同預判防守球員動作能力,暫時對佢觀感唔錯,唯獨擔心佢會易傷,因為佢身型都有d單薄。
結語:第一場比賽取得首勝,當然值得開心,目光要放在未來三場比賽,特別是作客對歐聯冠軍利物浦,以及死敵熱刺。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→