點評曼聯球員季前表現 - 失意舊將準備重生 精選

曼聯今季喺轉會市場動作頻頻，今個賽季嘅組軍唔單止要比新人適應，仲要比一班上季打唔出表現嘅舊人，重拾返應有嘅狀態。唔少球員因為上季表現差，而冇得出戰歐國盃同美洲盃，令主帥坦赫有更多時間針對佢哋一個一個專門訓練，喺夏天季前賽嘅美國之行表現。

上季加盟後幾乎傷足全季嘅中場蒙特，趕得切喺季尾復出，足總盃決賽都有佢嘅上陣時間，今季就係佢重新起步嘅時機。早前喺洛杉磯對阿仙奴嘅友誼賽，蒙特有半場嘅上陣時間，專踢4-2-3-1陣式嘅十號位，表現比預期中亮眼。
除咗為曼聯前線梳理進攻之外，喺防守時留喺陣型前沿位置嘅佢，更擔當球隊喺快速反擊攻勢時嘅派牌角色，以佢嘅精準傳球配合其他快翼突擊。而喺左翼拉舒褔特喺中路等波嘅時候，蒙特偶爾會移去左路持球，由邊路扭入禁區後再分波，為隊友減少壓力。

呢度講嘅快翼，就包括上季成功上位嘅阿麥迪亞路，佢今場波壓過安東尼、加拿祖等等球員，擔當正選右翼，開局時嘅發揮幾亮眼，只係有少少愈踢愈沉嘅感覺，之後換上安東尼，右路都係冇乜起色。
另外仲有好表現嘅，就係上季加盟嘅中鋒賀倫，呢位丹麥國腳由歐國盃歸隊後，延續先前一季同拉舒褔特嘅默契，同時都為曼聯領先阿仙奴1-0。但賀倫之後同新援約羅一齊受傷，為曼聯開季蒙上少少陰影。

講返蒙特，今場波嘅發揮話比大家知，佢最舒服嘅位置始終係十號位攻中，上季買佢返嚟係為咗比佢同般奴費南迪斯喺4-3-3陣式之中一齊上陣，但效果未出嚟，就已經受傷長抖。嚟緊呢季嘅曼聯有，中場文奴幾近成為其中一個鐵膽，如果蒙特打得起，就同文奴、般奴之間可以形成一個穩定嘅輪換，喺防中嘅保護之下，喺4-2-3-1、4-3-3兩套陣式都能夠有充足嘅戰力。
所以曼聯最後一個問題，就係卡斯美路退化之下，喺六號防中位嘅補充。