甘賓尼教拜仁 - 少帥生涯突破 精選

般尼確定降班，甘賓尼喺隊內交待咗下季喺英冠嘅組軍計劃之後，就去咗旅行。呢段時間，拜仁都搵緊新嘅教頭，但點諗都諗唔到，最後聯絡上啱啱先喺英超護級失利嘅甘賓尼（Vincent Kompany）。

喺般尼兩年時間，由升班再降班，過程唔單止係成績嘅起落，佢嘅用人都受到隊內嘅質疑。部份喺英冠升班嘅功臣，升上英超後不受重用，甘賓尼都未有好好個別解釋，點解某啲球員會被冷落，而係一味用訓練表現去決定人選。所以甘賓尼喺高層眼中地位甚高，係對下唔係人人信服。

雖然般尼踏入2024年嘅表現有所起色，但前1/3球季嘅13場比賽之中只有1勝1和，前面實在失分太多，季中變陣發力都難以挽回降班嘅命運。

不過，今季般尼成績強差人意，資源不足都係主因，唔影響外界對甘賓尼呢位少帥嘅期望。過去四年喺安德烈治同般尼，喺戰術風格上嘅進取，令外界對甘賓尼呢位少帥有唔少期待。而拜仁睇得中佢，因為喺佢身上見到哥迪奧拿嘅影子，控球率高，防守積極施壓。呢套踢法，如果套用喺資源豐盛嘅拜仁，大有可為。
聘請一個經驗尚淺嘅少帥，對拜仁嚟講當然係一場賭博。「管唔管得住班大帝」，係對甘賓尼帶領拜仁嘅能力最大嘅質疑。
離開英超前，甘賓尼擔任曼城隊長三年，踢波同時學師，喺執教時嘅領軍風格，見到啲哥帥嘅影響。拜仁請得呢位少帥，自然對成績唔能夠要求咁多，佢哋都明白甘賓尼嘅教練生涯都係啱啱先開始，反而潛力係佢哋睇得上甘賓尼嘅地方。
喺比利時首都圈長大嘅甘賓尼，法文同比利時荷文係佢嘅母語，而佢嘅德文能力都唔差，加上喺英超打滾咁多年嘅經驗，英文能力都唔成問題。而家嘅拜仁仍然以德國球員為主體，加上一啲法國主力，同時又有簡尼、迪亞呢兩位用一季時間就成功融入拜仁嘅英格蘭球員，甘賓尼嘅多語能力，正正契合拜仁隊內溝通嘅需求。

甘賓尼係唔係一個適合教拜仁嘅教頭，呢一刻無從評斷，但唔應該一開始就抹殺佢喺德甲會成功嘅可能性。幾年前拿高士文嚟到拜仁，咪又係一個冇乜經驗嘅少帥，但佢至少有完成到「德甲冠軍」呢個基本要求。甘賓尼作為教練，潛力甚高，下季拜仁比佢嘅任務，正正就係呢樣。