達成三連冠但唔再係鐵膽 基亞利殊今季跌跌撞撞 精選

受傷患影響，兼有新人競爭，曼城中場基亞利殊（Jack Grealish）今季上陣時間銳減，甚至影響到歐國盃嘅出場機會。

基亞利殊今季只有20次英超上陣，當中正選只佔10次。踏入2024年之後，一月、二月、三月都冇列入正選，完全唔係一個陣中主力應有嘅模樣。

當然，佢9月受到一次嚴重嘅大腿傷患，係佢今季打得差嘅起因之一。 佢嗰陣話：「醫生話，呢種撞傷係佢見過最嚴重嘅。一般撞傷出血，嚴重嘅傷口會有6cm，但我個傷口有成20cm。」自此，今季基亞利殊踢出加盟曼城以嚟，最差嘅一個球季。另外，杜古由法甲雷恩加盟曼城，直接影響到基亞利殊嘅正選位置。呢位比利時飛翼喺英超嘅第一季，已經交出非常好嘅表現，由右翼轉打左路，都唔影響佢發揮速度同技術，由配合到哥帥對迫搶嘅要求。喺以技術流為主嘅曼城陣中，風格迴異嘅杜古依然憑單兵解鎖防線嘅能力，為曼城左邊開出一條血路。相對而言，受傷患同狀態影響嘅基亞利殊，就被貶為後備兵。
贏得英超冠軍後，曼城今季最後一場波係足總盃決賽，基亞利殊喺球隊落後0-2嘅情況下，依然冇出場改變戰局嘅機會。領隊哥迪奧拿喺賽後話：「我唔知將來會發生啲咩事，但我知道有啲球員需要決定佢哋係咪繼續同我哋一齊，而且可能會有新球員加入。」
不可否認嘅係，加盟三季以嚟季季都有聯賽冠軍，今季曼城完成英超四連霸，呢個歷史成就當然有基亞利殊嘅貢獻。不過，基亞利殊喺煞科日接受《SkySports》採訪時表示，唔滿意自己今季嘅表現。 身處於星光熠熠嘅曼城，唔好話基亞利殊，連後防大將迪亞斯、中場大腦迪布尼都唔能夠擔保自己有絕對鐵膽嘅地位。
但哥帥對基亞利殊依然有信心：「佢會強勢回歸，今季係跩啲，但杜古係最後幾場比賽中表現出色，大家都有眼見。」 而喺基亞利殊眼中，今季跌跌撞撞嘅過程當中，哥帥都幫咗佢唔少，盡量要佢爬返起身。

球會賽事完結，之後就係準備歐國盃。3年前嘅歐國盃，主要喺正選陣容消耗完對手體力之後，再後備上陣接管戰局，堪稱英格蘭嘅第12人，取得亞軍成績佢功不可沒。

但總括而言，今季佢嘅表現令人失望，而修夫基喺國際大賽都冇重用過基亞利殊，加上科頓、彭馬嘅掘起，基亞利殊嘅「第12人」角色都受到幾大嘅威脅。縱使今季狀態滑落，基亞利殊都有入選主帥修夫基嘅33人初選名單，而家係睇最後篩走嘅7個球員當中會唔會有佢份。