【爭射十二碼】普帥不滿小將內鬨 彭馬：大家都係想幫手啫

「真係羞家。」車路士大勝愛華頓6-0嘅比賽之中，發生三個年青球員爭射十二碼嘅情形。作為主帥嘅普捷天奴，賽後受訪以「Shame」嚟形容呢單嘢。

週一晚英超比賽，車路士主場佈陣，主將高爾彭馬（Cole Palmer）嘅開波30分鐘完成帽子戲法，表現搶fo。半場雞之前，又有中鋒尼高拉積遜（Nicolas Jackson）入波，4-0領先加上愛華頓表現不濟，勝負早已毫無懸念。
事件發生喺64分鐘，還原返當時嘅情況：干拿加拉加喺前場反搶成功，交比彭馬喺右側切入禁區，喺禁區邊被三人包夾後倒地，本身已經有被犯規嘅嫌疑，但球證無表示。個波傳返出去比馬度亞基（Noni Maduelke），扭入返禁區後被撞跌，呢吓球證終於吹。

作為主射手，彭馬返返十二碼點準備，但馬度亞基就認為自己搏嘅十二碼要自己射，攬住個波唔放。 作為比賽隊長嘅加拉加，已經第一步介入調停，但積遜突然又加入爭波，彭馬攞到波之後，仲伸手推咗積遜一吓。加拉加將兩位隊友駛開，彭馬先準備射碼，射成5-0。
「我哋唔可以有咁嘅行為，我已經同佢哋講：呢次係最後一次！」大勝一場，同時發生內鬨，普捷天奴對呢個畫面好不滿，強調彭馬係隊內劊子手：「我哋要成為一支偉大嘅球隊，就需要改變，凡事先為團隊利益着想。」

作為呢場波嘅主角，彭馬以4球嘅成績行出球場，但內鬨事件無疑為球隊添上疑雲。佢上半場嗰三球波，鋒線拍檔積遜都有份參與。但下半場爭執之後射入十二碼，積遜就冇行埋去同彭馬一齊慶祝。

「其他球員都想射，都理解嘅，始終領先緊4-0。」賽後《SkySports》問返呢件事，彭馬都強調返自己作為隊內十二碼劊子手嘅角色：「我哋每個人都想承擔責任，可能喺爭執時做得過咗火位，但每個人都想幫吓隊波啫，事後我哋都有拎返件事出嚟講笑。」
普捷天奴補充，唔需要懲罰涉事嘅兩位球員，同時向球迷道歉：「呢個係一支年輕球隊需要學習嘅過程。賽後我同球員講咗，呢次係最後一次。」


連續兩場喺史丹福橋帽子戲法，近6場總計11球嘅表現，令彭馬手執20個英超入波，同曼城神鋒夏蘭特一樣，絕對有能力問鼎金靴獎大位。